Երևանում չորրորդ տարին անընդմեջ անցկացվելու է «Աշխարհի գույները» փառատոնը (ՏԵՍԱՆՅՈՒԹ)
19-10-2018 16:43:08 | Հայաստան | Հասարակություն
Երևանում չորրորդ տարին անընդմեջ անցկացվելու է «Աշխարհի գույները» փառատոնը:
Ինչպես հոկտեմբերի 19-ին լարգրողների հետ հանդիպման ժամանակ տեղեկացրեց փառատոնի կազմակերպիչ, «Հանդես» փրոդաքշնի հիմնադիր-տնօրեն, հեղինակ-կատարող, լրագրող, հաղորդավար Արման Կարապետյանը, փառատոնի շրջանակներում ներկայացնում են տարբեր ազգերի մշակույթներ, ներգրավում են նաև Հայաստանում բնակվող ազգային փոքրամասնությունների ներկայացուցիչներին:
Նրա փոխանցմամբ՝ այս տարի, մասնավորապես, ներգրավված են Հայաստանում վրացական համայնքի ներկայացուցիչները:
«Եվ մի փոքրիկ բարեգործություն ենք իրականացնելու այս անգամ, առողջական խնդիրներ ունեցող երեխաներին ենք աջակցելու: Փառատոնը բարեգործական բնույթ չի կրում, ուղղակի «Առողջության բանաձև» ամսագիրն ուներ նմանատիպ նախաձեռնություն, որին մենք ևս միացել ենք»,- նշեց Ա. Կարապետյանը:
Վերջինիս խոսքերով՝ փառատոնի մասնակիցները հանդես են գալու երգ ու պարի, նաև ասմունքի ելույթներով, տարիքային սահմանափակում չկա, իսկ միջոցառման ավարտին նրանց շնորհվելու են պատվոգրեր ու մեդալներ:
Փառատոնի կազմակերպիչը խոստացավ անակնկալներով լի երեկո մասնակցել ցանկացողների համար:
Նշենք, որ «Աշխարհի գույները» փառատոնը կկայանա հոկտեմբերի 21-ին ժամը 18:00-ին Երևանի Թատրոնի և կինոյի պետական ինստիտուտի ուսանողական թատրոնում: