Չպետք է տարանջատել ժողովրդի անվտանգության և տարածքների ամբողջականության հարցը. Դ. Բաբայանը` ԱՀ-ՀՀ հնարավոր ռազմաքաղաքական դաշինքի մասին.Tert.am

17-11-2018 13:11:11   | Հայաստան  |  Մամուլի տեսություն
Tert.am-ը Արցախի Հանրապետության և ՀՀ-ի միջև հնարավոր ռազմաքաղաքական դաշինքի կնքման մասին խոսել է Արցախի նախագահի մամուլի խոսնակ Դավիթ Բաբայանի հետ: Ըստ նրա` ռազմաքաղաքական դաշինքի կնքումը կարող է բազմաթիվ հարցեր առաջացնել:
 


-Պարո´ն Բաբայան, Արցախի անվտանգության խորհրդի քարտուղար Վիտալի Բալասանյանը նշել էր, որ ՀՀ-ի և ԱՀ-ի միջև կնքվելու է ռազմաքաղաքական դաշինք: Նա շեշտել էր, որ համոզված է՝ ՀՀ-ում խորհրդարանական արտահերթ ընտրություններից հետո` կարճ ժամանակ անց, կունենանք այդ փաստաթուղթը: Ինչպիսի՞ դաշինքի մասին է խոսքը:
 
-Նման փաստաթղթի մասին պարբերաբար խոսում են, միգուցե, եթե լիներ այդ փաստաթուղթը, քաղաքական ինչ-որ նպատակների կարելի էր հասնել, բայց նույնիսկ նրա բացակայության պայմաններում, ես չեմ կարծում, որ երկու հայկական պետությունների համագործակցությունը գտնվում է ցածր մակարդակի վրա: Այսինքն` ֆորմալ պայմանագրի առկայությունը կամ դրա բացակայությունը դե ֆակտո չի ազդում համագործակցության վրա: Բացի դրանից, եթե նման պայմանագրի անհրաժեշտությունը կա, դա պիտի լինի՝ կախված ինչ-որ կոնկրետ իրավիճակից և այլն: Մենք պետք է ամեն ինչ անենք, որ զգացմունքային պահը մի կողմ դնենք, պետք է հաշվի առնենք, որ եթե սկսենք դաշինքի, պայմանագրի վրա աշխատել, դա ինչպիսի արձագանք է ունենալու աշխարհում, ինչ է լինելու, հազար ու մի խնդիր կա, պիտի շատ լավ մտածենք: Շեշտում եմ` եթե մենք այդպես ենք ասում, դա չի նշանակում, որ մենք դեմ ենք պայմանագրին կամ երկու հայկական պետությունների համագործակցությանը դեմ ենք:
 
-Բայց Վիտալի Բալասանյանն ասել էր, որ մայիսին ՀՀ իշխանություններին նման առաջարկ է արվել, և առաջարկն ընդունվել է, տրվել են համապատասխան հանձնարարականներ, տարվել են աշխատանքներ և, կարելի է ասել, որ փաթեթն արդեն պատրաստ է:
 
 
 
 
-Իրավական կողմում փաթեթը մեկ այլ բան է, բայց, իմ անձնական կարծիքով, եթե այդպիսի փաստաթուղթ չկա, դա չի նշանակում, որ համագործակցություն չկա, շատ բարձր մակարդակի վրա է գտնվում:
 
-Պարո´ն Բաբայան, փաստաթղթով մի կողմ է դրվելու «Արցախի անվտանգության երաշխավոր» եզրույթը, Բալասանյանն ասել էր, որ պետք է ունենանք այդ փաստաթուղթը, որտեղ նշված կլինի, որ Հայաստանը Արցախի ժողովրդի անվտանգության երաշխավորն է, այստեղ կարևոր է «ժողովրդի անվտանգության երաշխավոր» ձևակերպումը, այլ ոչ թե «տարածքային ամբողջականության երաշխավոր»: Ինչպե՞ս հասկանանք, մեկը մյուսին լրացնո՞ւմ է, թե բացառում:
 
-Գիտեք, այսպիսի դաշինքները պիտի ուղղված լինեն բանակաշինության և պաշտպանության ոլորտում համագործակցությանը: Հիմա փաստ է, որ ՀՀ-ն Արցախի անվտանգության երաշխավորն է, ընդհանուր առմամբ, չենք տարանջատում ժողովրդի, պետության, տարածքների, դա գրված է ՀՀ ազգային անվտանգության հայեցակարգում:
 
-Այսինքն՝ դաշինքով տարանջատելը ճիշտ չի լինի՞:
 
-Գիտեք, չէ, ինչքան շահարկում կարող է դրանից հետո ի հայտ գալ: Ի՞նչ է նշանակում ժողովրդի կամ տարածքի, ընդհանուր պետք է լինի Արցախի անվտանգության երաշխավոր, այնպես, ինչպես կա, այնպես, ինչպես պիտի լինի:
 
-Պարո´ն Բաբայան, կարելի է ենթադրել, օրինակ, եթե եզրույթների այդպիսի տարանջատում լինի, վտանգի պահին ժողովրդին կարելի է բերել ՀՀ տարածք, ասել, որ ժողովրդի անվտանգության երաշխավորն եք, տարածքների հարցը մնա:
 
-Այ, շահարկումներից մեկը կարող է դա լինել, դրա համար, որպեսզի զերծ մնանք այդ ամենից, կա շատ ճիշտ, համապարփակ ընդգրկուն ձևաչափ, որը գործում է`Արցախի անվտանգության երաշխավոր, այսինքն՝ սրա մեջ մտնում է ամեն ինչ՝ և´ Արցախի պետականության, և´ ժողովրդի անվտանգության, և´ տարածքների երաշխավորության հարցը:
 
 
 
 
 
Նոյյան տապան   -   Մամուլի տեսություն
Լուրեր Հայաստանից եւ Սփյուռքից

Կարդացել են 1030 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար


Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար