Բնապահպանության նախարարը հանդիպել է KfW բանկի ներկայացուցիչներին
19-02-2019 17:41:41 | Հայաստան | Մամլո հաղորդագրություն
Բնապահպանության նախարար Էրիկ Գրիգորյանն ընդունել է KfW գերմանական բանկի ծրագրի ղեկավար Ալվարո Բեռիելին և հայաստանյան ներկայացուցիչ Զառա Չատինյանին: Հանդիպմանը քննարկվել են համագործակցության ընթացիկ և հեռանկարային ծրագրերը։
Կողմերը քննարկել են նաև կենսաբազմազանության և անտառային ոլորտի զարգացման համար KfW բանկի կողմից Հայաստանին հատկացված 23.2 մլն եվրո դրամաշնորհի մեկնարկային գործընթացները, ինչպես նաև արդեն իրականացվող «Պահպանվող տարածքների աջակցման ծրագիր-Հայաստան» 8.25 մլն եվրո արժողությամբ ծրագիրը։ Վերջինիս շրջանակներում 2018 թվականին ՀՀ բնապահպանության նախարարության կողմից իրականացվել են մոտ մեկ միլիոն եվրո արժողությամբ աշխատանքներ՝ ուղղված անտառների վրա ճնշումների նվազեցմանը։
Նախարար Էրիկ Գրիգորյանը կարևորել է նախարարության նախաձեռնած բնապահպանական քաղաքականության համալիր բարեփոխման և ենթակառուցվածքների հզորացման միջոցառումների ուղղությամբ գերմանական գործընկերների հետ համագործակցությունը, ինչի համատեքստում դիտարկվել են ջրային ռեսուրսների, բնության հատուկ պահպանվող տարածքների և անտառների կառավարմանը, փորձաքննության գործընթացի կատարելագործմանը և կարողությունների հզորացմանը վերաբերող հարցեր։
ՀԱՅԵՐԵՆ
Русский
English
Դաս. հայերեն
French
