ՀՀ ԿԵ սննդամթերքի անվտանգության տեսչական մարմինը հանրապետության մարզերում անցկացնում է կենդանիների սուր վարակիչ և հատուկ վտանգավոր հիվանդությունների վերաբերյալ իրազեկման միջոցառումներ, որոնց ընթացքում մարզպետարանների, համայնքապետարանների, գյուղացիական և ֆերմերային տնտեսությունների ներկայացուցիչներին, ինչպես նաև համայնքը սպասարկող անասնաբույժներին ՍԱՏՄ մասնագետները կներկայացնեն այն միջոցառումներն ու գործողությունները, որոնք անհրաժեշտ են կենդանիների հիվանդությունների կանխարգելման, ախտորոշման, բուժման կամ դրանց վերացման համար:

 

Իրազեկումը մեկնարկել է Տավուշի մարզից: Տեսչական մարմնի ղեկավար Գեորգի Ավետիսյանը ներկայացրել է, այն վտանգները, որոնք սպառնում են մարդուն կենդանական հիվանդությունների առկայության դեպքում: «Մեր հիմնական խնդիրը մարդկանց և կենդանիների համար ընդհանուր հիվանդություններից բնակչության պաշտպանությունն է: Կենդանիների առողջության պահպանումը նշանակում է մարդու առողջության պահպանում. մենք սա պետք է խորապես գիտակցենք և անենք ամեն ինչ անհարկի հետևանքներից խուսափելու համար»,- ասել է նա: Բանախոսը նաև զգուշացրել է այն տնտեսական վնասների մասին, որոնք կարող են կրել ոչ միայն ֆերմերները, այլև պետությունը, եթե հիվանդությունների կանխարգելման միջոցառումները ժամանակին ու պատշաճ չիրականացվեն:

 

ՍԱՏՄ անասնաբուժության տեսչության պետ Հովհաննես Մկրտչյանը մասնակիցներին հորդորել է կենդանիների հիվանդություններին, անասնակերի որակին ու անվտանգությանը, անասնաբուժական դեղերին ու դրանց առնչվող խնդիրների հետ կապված ցանկացած հարցով դիմել տեսչական մարմնի մասնագետներին: Նա վստահեցրել է, որ դիմողները կստանան անհրաժեշտ խորհրդատվություն ու աջակցություն:

 

Նոյյան տապան  -   Մամլո հաղորդագրություն