«Ամենամեծ սպառնալիքը մեր պառակտումն է». «ԿԱՄՔ» նախաձեռնությունը միանում է «Հայրենիքից հող չունենք հանձնելու» կարգախոսով հանրահավաքին (ՏԵՍԱԳՐՈՒԹՅՈՒՆ)

22-02-2019 16:02:37 | Հայաստան | Մամուլի սրահ

Փետրվարի 22-ին «Նոյյան Տապան» լրատվական գործակալության մամուլի սրահում հայկական արժեքների պահպանության «ԿԱՄՔ» հասարակական նախաձեռնության անդամները հայտարարեցին Երևանում անցկացվելիք «Հայրենիքից հող չունենք հանձնելու» կարգախոսով հանրահավաքին միանալու իրենց համաձայնության մասին և հանդես եկան կոչով։

Բանախոսներն են՝

Վահանգն Չախալյան - «ԿԱՄՔ» հասարակական նախաձեռնության համակարգող խորհրդի անդամ

Դավիթ Պալյան - «ԿԱՄՔ» հասարակական նախաձեռնության անդամ

Գևորգ Գուլումյան - «ԿԱՄՔ» հասարակական նախաձեռնության անդամ

«ԿԱՄՔ» հասարակական նախաձեռնության անդամների կոչը

Հայկական արժեքների պաhպանության «ԿԱՄՔ» հասարակական նախաձեռնությունը կոչ է անում մասնակցել փետրվարի 26-ին ժամը 18:00-ին Ազատության հրապարակում հրավիրված հանրահավաքին:

Միաժամանակ ընդգծում ենք, որ հանրահավաքը չունի և չի կարող ունենալ որևէ նեղ անձնային, խմբային կամ առավելևս՝ քաղաքական շահեր հետապնդող դրդապատճառներ:

Մենք հարկ ենք համարում արձանագրել, որ հակված չենք մտածելու, որ հայրենի իշխանությունները հանուն ինքնանպատակ խաղաղության կարող են գնալ ապազգային քայլերի՝ հակառակորդի հետ քննարկելով հնարավոր զիջումներ կամ փոխզիջումներ տարբերակները:

Մյուս կողմից, հանրահավաքը դիտարկում ենք լրացուցիչ աջակցություն երկրի վարչապետին՝ բանակցային գործընթացում ազգային ու պետական շահերի վստահ ու վճռական առաջմղման տեսանկյունից:

Վստահ ենք, որ իրական արտաքին սպառնալիքի և կամ գործընթացի ոչ հայանպաստ ընթացքի դեպքում հարյուր հազարավոր հայեր պատրաստ են պաշտպանել հայրենիքը և հարկ եղած դեպքում պարտադրել իրենց դիրքորոշումը: Այս տեսանկյունից, ևս մեկ անգամ կարևորում ենք բոլորի մասնակցությունը հարահավաքին:

Կոչ ենք անում հասարակական-քաղաքական կազմակերպություններին, քաղաքացիական խմբերին, հանրային այս կամ այն հատվածի ներկայացուցիչներին, անհատներին, ակտիվորեն մասնակցել հանրահավաքին և հաստատել այն պարզ ճշմարտությունը, որ հայ զինվորի կողմից վերահսկվող հայրենիքի ամեն մի միլիմետր հողը հայի հայրենիքի անբաժան և անօտարելի մասն է:

Մենք հայտարարում ենք, որ հայրենիքը ոչ թե տարածք է, այլ կենսատարածք, սրբազան հող:

Ուստի՝ հայրենիքը մեկն է ու ամբողջականը և համազգային այս հիմնախնդիրը իր լուծումը պետք է ստանա միայն մեկ տարբերակով՝ Հայաստանի Հանրապետությանը Արցախի միացմամբ:

Ասուլիսին ներկա լրատվամիջոցները

1Հ2TV

2.NT.am

3Ա1+

4.Tert.am

Հավելյալ տեղեկությունների համար դիմել՝ 060-35-11-24 կամ 093-669-339 հեռախոսահամարներով՝ Մարի Պետրոսյանին։

Նոյյան տապան - Մամուլի սրահ