Ֆիլմարտադրողների Համահայկական Ֆեդերացիա (ՖԱՀՖ) 10-րդ Հավաքի Ուղերձը ՀՀ իշխանություններին, ոլորտի մասնագետներին, հասարակությանը

20-03-2019 11:39:43   | Հայաստան  |  Մամլո հաղորդագրություն
20-03-2019, ք․ Երևան
Շարժապատկերային Արվեստների ՍԻՆԵՄԱ կենտրոն
 


Ֆիլմարտադրողների Համահայկական Ֆեդերացիա նախաձեռնությունը՝ ՖԱՀՖ, որի առաջին հավաքը տեղի է ունեցել 2018թ-ի հուլիսի 19-ին, իր գոյության կարճ ժամանակահատվածում դարձել է հայրենական կինոարտադրության ոլորտում տեղի ունեցող զարգացումների հիմնական կատալիզատորն ու առանցքային դերակատարներից մեկը:
 
 
ՖԱՀՖ-ը հիմնադրման պահից հայտարարել է հայկական կինոյի պետական կառավարման անարդյունավետության, ստվերայնության, կոռումպացվածության մասին, համարելով կինոյի պետական կառավարման արատավոր համակարգը Հայաստանում կինոյի զարգացման ճանապարհին առկա հիմնական խոչընդոտը: Նախաձեռնությունը չի թաքցրել, որ պայքարելու է այդ համակարգը արմատապես բարեփոխելու, տասնամյակներ շարունակ հայկական կինոն ի պաշտոնե կամ ստվերային կառավարող մարդկանց համակարգից հեռացնելու համար:
 
2018թ-ին ՖԱՀՖ-ի ակտիվ պայքարն ու կոշտ քննադատությունը նպաստել են «Հայաստանի ազգային կինոկենտրոն» ՊՈԱԿ-ի
ընդունած անօրինական կանոնակարգի չեղարկմանը և նոր կանոնակարգի մշակմանը, իսկ դեկտեմբերին ՖԱՀՖ-ի հետևողական պնդումների արդունքում հրապարակվել են «Հայաստանի ազգային կինոկենտրոն» և «Փաստավավերագրական ֆիլմերի Հայկ կինոստուդիա» ՊՈԱԿ-ների միջոցով պետական աջակցություն ստացած ֆիլմերի ցանկն ու գումարների չափը։
 
2019թ-ի սկզբին ՖԱՀՖ-ը, վերլուծելով վերջին տարիներին Հայաստանում պետական աջակցությամբ ստեղծված ֆիլմերի վարձույթում և միջազգայնի կինոփառատոներում արձանագրած աղետալի վիճակագրությունը, համակարգելով հետխորհրդային և արևելյան Եվրոպայի երկրների կինոյի պետական կառավարման հաջողված փորձը, ՀՀ կառավարությանը առաջարկել է կինոյի պետական կառավարման նոր համակարգի նախագիծ։
 
ՖԱՀՖ-ի կողմից մշակված այդ համակարգի առանցքը ՀՀ պետական բյուջեով կինոյին հատկացվող գումարների արդյունավետ տնօրինումն է, ներքին շուկայում պետական աջակցությամբ ստեղծված ֆիլմերի վարձույթի նոր մեխանիզմի գործարկումը և միջազգային կինոարդյունաբերության մեջ Հայաստանի ներկայացվածության խթանումը։
 
ՖԱՀՖ-ի առաջարկած նոր համակարգի լիարժեք կիրառման արդյունքում առաջիկա 3-4 տարիներին հայկական կինոարտադրությունը կարող է գրանցել արտադրական ծավալների, այդ թվում հայկական ֆիլմերի ներքին վարձույթում արձանագրված արդյունքների և հայկական կինոնախագծերում միջազգային ներկայացվածության շեշտակի աճ:
 
ՖԱՀՖ-ը ուրախ է արձանագրել, որ հայրենական կինոյի արդյունավետ պետական կառավարման նոր համակարգի հիմքում դրված իր գաղափարները ամբողջությամբ համընկնում են Հայաստանում պետական կառվարման
նոր գաղափարախոսության և ռազմավարության հետ։
 
ՖԱՀՖ-ը հաստատակամ է Հայաստանում կինոարտադրության արմատական բարեփոխման իր տեսլականը իրականացնելու գործում և ազդարարում է այդ բաղձալի նպատակին հասնելու համար ՀՀ-ում գործող կինոյի բոլոր կառույցների ու կազմակերպությունների հետ կառուցողական երկխոսության, ՀՀ օրենսդիր և գործադիր իշխանությունների հետ՝ արդյունավետ համագործակցության գործընթաց սկսելու մասին:
 
Ուղերձն ընդունված է ՖԱՀՖ 10-րդ Հավաքի մասնակիցների և հաստատված է ՖԱՀՖ անդամների կողմից միաձայն։
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 263 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար