Նարեկ Սարգսյանը կամ որևէ մեկն ինձ չի զանգահարել, եթե դա ապացուցվի, ապա պատրաստ եմ հրաժարվել իմ պաշտոնից. Վալերի Օսիպյան (ՏԵՍԱՆՅՈՒԹ)
25-03-2019 17:08:13 | Հայաստան | Հասարակություն
Նարեկ Սարգսյանը կամ որևէ մեկն ինձ չի զանգահարել, եթե դա ապացուցվի, ապա ես պատրաստ եմ հրաժարվել իմ պաշտոնից:
Այս մասին մարտի 25-ին կայացած կառավարության արտահերթ նիստից հետո լրագրողների հետ ճեպազրույցում հայտարարեց ՀՀ ոստիկանապետ Վալերի Օսիպյանը՝ անդրադառնալով politik.am կայքի հիմնադիր Բորիս Մուրազիի հայտնած այն համոզմունքին, թե ոստիկանապետը հեռախոսով խոսել է ՀՀ երրորդ նախագահ Սերժ Սարգսյանի եղբորորդու՝ ներկայումս հետախուզման մեջ գտնվող Նարեկ Սարգսյանի հետ:
Ըստ ոստիկանապետի՝ Բ. Մուրազիի այդ հայտարարությունից հետո ինքն անձամբ է զանգահարել վերջինիս և հայտնել, որ տվյալ ինֆորմացիան իրականությանը չի համապատսխանում, հետևաբար ինչո՞ւ է հրապարակել:
«Ես շատ լրագրողների եմ զանգում, լրագրողներն էլ ինձ են զանգում: Միգուցե դուք էլ ինչ-որ հոդված տեղադրեք, ես ձեզ զանգահարեմ, ասեմ, որ իրականությանը չի համապատասխանում, ինչո՞ւ եք հրապարակել: Ես ընդամենը հարցրել եմ՝ որևէ սպառնալիք չի եղել»,- պարզաբանեց Վ. Օսիպյանը:
Վերջինիս, կարևորելով լրագրողների աշխատանքը, դերն ու առաքելությունը հասարակության կյանքում, լրագրողներին հորդորեց չճշտված տեղեկություն չճշտված աղբյուրից չհրապարակել, քանի որ դա խանգարում է ոստիկանության աշխատանքին: