Նորագյուղցի Բոգոյին ազատ արձակելուց հետո ջարդել են Արմավիր-Երեւան երթուղին սպասարկող ընկերության տնօրենի ավտոմեքենան
01-07-2019 18:48:37 | Հայաստան | Ի՞նչ է գրում մամուլը
armtimes.com Հունիսի 28-ի երեկոյան Երեւանի Կենտրոն վարչական շրջանի Պռոշյան փողոցում «վնասվել» է Արմավիր-Երեւան կանոնավոր ուղեւորափոխադրում իրականացնող՝ «Գալակտիկա տրանս սերվիս» ՍՊԸ-ի տնօրեն Շուշանիկ Խաչատրյանի ավտոմեքենան:
Խաչատրյանը մեր զրույցում ասաց, որ ոստիկանություն հաղորդում է ներկայացրել եւ հույս ունի, որ մեղավորները կպատժվեն:
Ոստիկանությունից մեր զրույցում հայտնեցին, որ Խաչատրյանից ահազանգ է ստացվել, որ ավտոմեքենան դիտավորյալ վնասել են, այժմ քննություն է ընթանում: Նշանակված է փորձաքննություն:
Վնասել են ավտոմեքենայի հետնապակին:
Հիշեցնենք, որ այդ օրը բերման էին ենթարկել Կենտրոնական ավտոկայանում երկար տարիներ հաստատված Նորագյուղցի Բոգոյին (Ռուբեն Կոստանյան), որը, սակայն, ժամեր անց ազատ էր արձակվել: Նշենք, որ Խաչատրյանը նախկինում հայտարարել է, թե Բոգոն արդեն երկար ժամանակ է՝ ազդում է «Երեւան-Արմավիր» կանոնավոր ուղեւորափոխադրում իրականացնող «Գալակտիկա տրանս սերվիս» ՍՊԸ-ի ուղեւորահոսքի վրա՝ սեփական ավտոմեքենաներով նշված երթուղով ուղեւորափոխադրում իրականացնելով:
Նորագյուղցի Բոգոյի անվան հետ առնչվող պատմությունները մամուլում շատ են: Դրանցից վերջինը թերեւս այն է, որ նա տարիներ շարունակ պետական շինություն հանդիսացող Կենտրոնական ավտոկայանի ներսում՝ 2-րդ հարկում, ապօրինի «սեփական» սենյակ եւ հյուրանոց էր ստեղծել: 2019-ի մարտին Բոգոն ստիպված էր եղել լքել այդ տարածքը՝ չմոռանալով վերջում քանդել եւ ավերակի վերածել այդ սենյակները:
2019 թվականի մարտի 1-ի լույս 2-ի գիշերը, ժամը 02:30-ին այրել էին նաեւ ՀՀ կենտրոնական ավտոկայանի տնօրեն Ռոման Համբարձումյանի «Լեքսուս» մակնիշի ավտոմեքենան: Համբարձումյանի նշանակվելուց հետո Կոստանյանը ստիպված էր լքել իր կողմից «սեփականաշնորհած» տարածքները:
ՀԱՅԵՐԵՆ
Русский
English
Դաս. հայերեն
French
