Անվտանգության ոլորտում ԵԱՀԿ-ն հատուկ վերապատրաստում է իրականացրել Պաշտպանի աշխատակազմի համար

21-10-2019 17:22:48   | Հայաստան  |  Հասարակություն
 


 
Հոկտեմբերի 16-18-ը ՀՀ մարդու իրավունքների պաշտպանի աշխատակազմի համար անցկացվել է դասընթացավարների վերապատրաստման եռօրյա դասընթաց` նվիրված անվտանգության ոլորտում կառավարման և վերահսկման մեխանիզմներին:
 
Դասընթացն առաջին միջոցառումն է, որն իրականացվել է ԵԱՀԿ-Հայաստան նոր համագործակցության ներքո` անվտանգության ոլորտում կառավարման հզորացմանը միտված ծրագրի շրջանակում:
 
«Անվտանգության ոլորտի ժողովրդավարական վերահսկողությունը կարևոր դեր ունի մարդու իրավունքների պաշտպանության և խթանման գործում և դա իմ գործունեության առաջնահերթություններից է», - բացման խոսքում նշել է Մարդու իրավունքների պաշտպան Արման Թաթոյանը: Նա նաև բարձր է գնահատել նման միջոցառման իրականացումը՝
հատկապես ընդգծելով, որ այդպիսի դասընթացները նպաստում են Պաշտպանի ներկայացուցիչների կարողությունների զարգացմանը և կարող են օգտակար լինել ոլորտում առկա խնդիրների լուծումն առավել արդյունավետ կազմակերպելու տեսանկյունից:
 
Դասընթացն անցկացրել են Սերբիայի Հանրապետության առաջին օմբուդսման Սաշա Յանկովիչը և Միացյալ Թագավորության զինծառայության հարցերով առաջին հանձնակատար Սյուզան Աթկինսը։
 
Վերապատրաստման ժամանակ ուսումնասիրվել են անվտանգության ոլորտի վերահսկողության միջազգային չափանիշները, անվտանգության ոլորտի մարմիններում, ներառյալ` բանակում մարդու իրավունքների խախտումների քննության ու մշտադիտարկման առանձնահատկությունները, քննարկվել ոլորտի մի շարք այլ հարցեր: Հատկապես ընդգծվել է անվտանգության ոլորտի կառավարման կատարելագործման գործընթացում Մարդու իրավունքների պաշտպանի դերը, որի իրականացրած վերահսկողական գործառույթները մեծապես նպաստում են ոլորտում մարդու իրավունքների խթանմանը:
 
Պաշտպանի ներկայացուցիչներին ներկայացվել են մշտադիտարկման այցերի, առանձնազրույցների, փաստահավաք առաքելությունների պլանավորման և անցկացման սկզբունքներն ու միջազգային լավագույն փորձը: Նաև ընդգծվել է պատշաճ կառավարման անհրաժեշտությունը զինված ուժերում մարդու իրավունքների ապահովման և ամրապնդման տեսանկյունից, որի ընթացքում յուրաքանչյուր զինծառայողի
նկատմամբ պետք է ցուցաբերվի անհատական մոտեցում: Դասընթացի ժամանակ անդրադարձ է կատարվել նաև մշակված տվյալների վերլուծության և անվտանգության ոլորտում մասնագիտական զեկույցների կազմման հմտություններին։
 
Դասընթացից հետո Մարդու իրավունքների պաշտպանի ներկայացուցիչները հնարավորություն կունենան ստացած գիտելիքների ու փորձի հիման վրա վերապատրաստման դասընթացներ իրականացնել անվտանգության ոլորտի իրավասու և շահագրգիռ անձանց համար:
 
 
 
Նոյյան տապան   -   Հասարակություն
Լուրեր Հայաստանից եւ Սփյուռքից

Կարդացել են 511 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար