Երեխաների ստեղծագործությունների միջազգային ցուցահանդեսում
ներկայացված են նաեւ Երեւանի մանկական գեղագիտական ազգային
կենտրոնի սաների աշխատանքները
03-06-2010 18:54:00 | Գերմանիա | Մշակույթ
ԲԵՌԼԻՆ, 3 ՀՈՒՆԻՍԻ, ՆՈՅՅԱՆ ՏԱՊԱՆ: Երեխաների պաշտպանության
միջազգային օրվա առթիվ հունիսի 1-ին Բեռլինի «Սոլիտեր»
պատկերասրահում տեղի է ունեցել «Մանկական երազներ» խորագրով
երեխաների ստեղծագործությունների միջազգային ցուցահանդեսի բացումը,
որին մասնակցել եւ ողջույնի խոսքով հանդես է եկել Գերմանիայում
Հայաստանի դեսպան Արմեն Մարտիրոսյանը:
Ինչպես «ՆՏ»-ին հայտնեցին ՀՀ ԱԳՆ Մամուլի եւ տեղեկատվության
վարչությունից, ցուցահանդեսը կազմակերպել է Բեռլինի «Ալբատրոս»
հասարակական կազմակերպության աշխատակից Մարգարիտա Թադեւոսյանը`
գերմանական «Ալբատրոս», «XXI-րդ հազարամյակն առանց պատերազմի»,
«Գեղեցիկ արվեստներին օժանդակող ընկերություն» հասարակական
կազմակերպությունների աջակցությամբ:
Գերմանիայում Հայաստանի դեսպանության առաջարկով Երեւանի
մանկական գեղագիտական ազգային կենտրոնը ցուցահանդեսին տրամադրել է
իր սաների 15 աշխատանքներ, որոնք արժանացել են բարձր գնահատանքին:
Ի նշան երեխաների հետ համերաշխության, ցուցահանդեսին իրենց մի
քանի աշխատանքներով մասնակցում են նաեւ Նոբելյան մրցանակի դափնեկիր
Գյունթեր Գրասը, հայտնի նկարիչներ Նորբերտ Բիսկին եւ Էլվիրա Բախը:
Ցուցահանդեսը, որի նպատակն է ընդարձակել արվեստի դերը որպես
երկխոսության միջոց տարբեր ազգությունների, հավատների եւ
սոցիալական ծագում ունեցող աճող սերնդի միջեւ, կշարունակվի մգործի
հուլիսի վերջ` հյուրընկալվելով Գերմանիայի տարբեր քաղաքներում: