Միջազգային հանրությունը պետք է Ադրբեջանին կոչ անի դուրս բերել իր օկուպացիոն ուժերը Հայաստանի ինքնիշխան տարածքից․ Մարուքյան
13-02-2024 13:29:40 | Հայաստան | Ի՞նչ է գրում մամուլը
Հայաստանի հատուկ հանձնարարություններով դեսպան Էդմոն Մարուքյանն անդրադարձել է Ադրբեջանի կողմից Հայաստանի դեմ հերթական ագրեսիային, որի հետևանքով հայկական կողմն ունի զոհեր և վիրավորներ։
«Ադրբեջանի պետական սահմանապահ ծառայության հայտարարության համաձայն՝ այս գիշեր նրանք իրականացրել են «Հատուցում» գործողությունը՝ հարձակվելով Հայաստանի ինքնիշխան տարածքում տեղակայված սահմանապահների դիրքերի վրա, ինչի հետևանքով երկու հայ զինծառայող է սպանվել, ևս մի քանիսը վիրավորվել են:
Սկզբում Ադրբեջանը հայտարարում է, որ հայկական կողմից հրաձգություն է եղել, կարծես վիրավոր է եղել, հետո հայկական կողմը հայտարարում է, որ հետաքննելու է միջադեպը, իսկ ադրբեջանական կողմը հարձակվում, սպանում և վիրավորում է մարդկանց ՝ չսպասելով որևէ հետաքննության ՝ դրանով իսկ ցույց տալով, որ նրանք պատրաստ են եղել հարձակման և պարզապես պատճառ են փնտրել:
Այսպիսով, ակնհայտ է, որ Ադրբեջանը չի հրաժարվում իր «ավանդական» հանցավոր, ագրեսիվ պահվածքից և սկզբում տարածում է անվերահսկելի, միակողմանի, կեղծ լուրեր, կարծես հայկական կողմից կրակոցներ են եղել, իսկ հետո պատրաստի գործողություն է իրականացնում Հայաստանի ինքնիշխան տարածքում ՝ սպանելով և խեղելով նոր կյանքեր:
Ադրբեջանի կողմից իրականացվող հանցավոր արարքների այս շղթան պետք է դադարեցվի։ Միջազգային հանրությունը պետք է դատապարտի Ադրբեջանի կողմից իրականացված նողկալի, չհրահրված գործողությունների այս շղթան և կոչ անի Ադրբեջանին դուրս բերել իր օկուպացիոն ուժերը Հայաստանի ինքնիշխան տարածքի ավելի քան 215 քառակուսի կիլոմետրից, ինչը փաստացի ագրեսիա և սադրանք է Հայաստանի դեմ»,- «Արմենպրես»-ի փոխանցմամբ՝ X-ի իր էջում գրել է Մարուքյանը։
Փետրվարի 13-ին՝ ժամը 05:30-ից սկսած, Ադրբեջանի ԶՈՒ ստորաբաժանումները հրաձգային զենքերից կրակ են բացել Ներքին Հանդի հատվածում տեղակայված հայկական դիրքերի ուղղությամբ, ինչի հետևանքով, նախնական տվյալներով, հայկական կողմն ունի երկու զոհ և վիրավորներ: Ժամը 9։30-ի դրությամբ՝ նշված ուղղությամբ ադրբեջանական զինուժի կրակը դադարել է։
ՀԱՅԵՐԵՆ
Русский
English
Դաս. հայերեն
French
