2009 Թ.-ին ՔԱՂԱՔԱՇԻՆՈՒԹՅԱՆԸ ՀԱՏԿԱՑՎԵԼԻՔ ԲՅՈՒՋԵՏԱՅԻՆ
ՄԻՋՈՑՆԵՐԻ ԳԵՐԱԿՇԻՌ ՄԱՍԸ ԿՈՒՂՂՎԻ ԿՐԹԱԿԱՆ ՕԲՅԵԿՏՆԵՐԻ ՎԵՐԱՆՈՐՈԳՄԱՆԸ
31-10-2008 20:00:00 | Հայաստան | Տնտեսություն
ԵՐԵՎԱՆ, 31 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ 2009թ.-ի պետբյուջեի
նախագծով քաղաքաշինության ոլորտին հատկացվելու է 30 մլրդ դրամ, որի
գերակշռող մասը` 83%-ը, ուղղվելու է կրթական ոլորտի օբյեկտների
հիմնանորոգմանն ու շինարարությանը: Ինչպես լրագրողներին տեղեկացրեց
քաղաքաշինության նախարար Վարդան Վարդանյանը, 2008թ.-ի համեմատ մոտ
50%-ով ավելի գումար է հատկացված միայն կրթական օբյեկտների
հիմնանորոգման եւ շինարարության աշխատանքներին, ինչի շնորհիվ
2009թ.-ին կվերանորոգվեն եւ կհիմնանորոգվեն 286 կրթական օբյեկտներ:
Նախարարը նշեց, որ մինչեւ 2013թ.-ը երկրաշարժից տուժած մոտ 7
հազար անօթեւան ընտանիքներ կապահովվեն բնակարաններով: Վերջերս
սկսվել են բնակարանային շինարարական աշխատանքները Գյումրիի Անի
թաղամասում: Զուգահեր կշարունակվի բնակարանների գնման վկայագրերի
ծրագիրը, որի շրջանակներում 2008թ.-ին հատկացվել է 2,6 մլրդ դրամ,
եւ 4 մարզերում մոտ 500 ընտանիքներ բարելավել են իրենց
բնակարանային պայմանները: Աղետի գոտու վերականգնմանը 2009թ.-ի
բյուջեով նախատեսված 4 մլրդ դրամից 1,7 մլրդ դրամը կուղղվի
բնակշինարարությանը, մնացածը` բնակարանների գնման վկայագրերի
ծրագրին, որի շրջանակներում 2009թ.-ին 570-600 ընտանիքներ
կբարելավեն իրենց բնակարանային պայմանները: