2010 Թ.-ԻՑ ՀԱՅԱՍՏԱՆՈՒՄ ԿՍԿՍՎԻ ԿԵՆՍԱԹՈՇԱԿԱՅԻՆ ՀԱՄԱԿԱՐԳԻ
ԲԱՐԵՓՈԽՈՒՄՆԵՐԻ ԻՐԱԿԱՆԱՑՈՒՄԸ
10-09-2008 18:00:00 | Հայաստան | Հասարակություն
ԵՐԵՎԱՆ, 10 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սոցիալական ոլորտը ծանր
է եւ պատասխանատու, իսկ անելիքները անսպառ, քանի որ սոցիալական
քաղաքականության առանցքում մարդն է, ցանկացած որոշման հտեւում`
մարդու ճակատագիրը: Նման կարծիք սեպտեմբերի 10-ին` իր
պաշտոնավարման 100 օրվան նվիրված ասուլիսում, հայտնեց ՀՀ աշխատանքի
եւ սոցիալական հարցերի նախարար Արսեն Համբարձումյանը: Ըստ նրա,
թեեւ ճիշտ չէ ավելնորդ շտապողականություն հանդես բերել, սակայն
առանց լուրջ արմատական փոփոխությունների ոլորտում դրական շոշափելի
տեղաշարժեր չեն արձանագրվի:
Նախարարը հայտնեց, որ առաջիկայում ՀՀ կառավարության
հաստատմանը կներկայացվի կենսաթոշակային բարեփոխումների լրամշակված
ծրագիրը, որով նախատեսվում է անցում կատարել բազմաստիճան
համակարգի: Այն բաղակացած է լինելու երկու` պետական բաշխողական եւ
մասնավոր կուտակային, բաղադրիչներից: Ա.Համբարձումյանը նշեց, որ
կենսաթոշակային համակարգի բարեփոխումների սկիզբը նախատեսվում է
2010թ.-ին: Համակարգը լինելու է քառաստիճան: Առաջինը սոցիալական
կենսաթոշակն է. պետությունը բոլորին ապահովելու է նվազագույն
սոցիալական կենսաթոշակով: Երկրորդը աշխատանքային կենսաթոշակն է,
որով նախատեսվում է 40-ից բարձր տարիքի աշխատող անձանց ապահովել
աղքատության շեմից մեկ ու կես անգամ բարձր եկամուտով: Հաջորդը
պարտադիր կուտակային կենսաթոշակն է, որով 40-ից ցածր տարիքի
աշխատողները կապահովվեն սահմանված սոցվճարումներին համարժեք
եկամուտով: Համակարգի վերջին աստիճանը կամավոր կուտակային
կենսաթոշակն է, որը տարեցների համար հանդիսանալու է լրացուցիչ
եկամուտի աղբյուր, եթե նրանք կատարում են կամավոր վճարումներ: