ԳՆԱՃԻ ԶՍՊՄԱՆ ԿԱՌԱՎԱՐՈՒԹՅԱՆ ԾՐԱԳԻՐՆ ՈՒՆԻ 4 ՈՒՂՂՈՒԹՅՈՒՆ
11-06-2008 23:00:00 | Հայաստան | Տնտեսություն
ԵՐԵՎԱՆ, 11 ՀՈՒՆԻՍԻ, ՆՈՅՅԱՆ ՏԱՊԱՆ: «Սպառողական ապրանքների
գների աճը վտանգում է աղքատության հաղթահարման ծրագրի արդյունավետ
իրականացումը, ուստի խնդիրը կառավարության ուշադրության կենտրոնում
է»,- հունիսի 11-ին Ազգային ժողովում հայտարարեց ՀՀ վարչապետ
Տիգրան Սարգսյանը:
Պատգամավորի այն հարցին, թե ինչո՞ւ Հայաստանի շուկան չի
արձագանքում միջազգային շուկայում որոշ ապրանքատեսակների գների
կտրուկ նվազմանը, վարչապետը նշեց, որ համաշխարհային շուկաներից
եկող գնաճային ճնշումները դեռեւս պահպանվում են: Նա, մասնավորապես,
մատնանշեց վառելիքի գները, որոնք վերջին 4 տարիների ընթացքում 4
անգամ աճել են: Ըստ վարչապետի, համաշխարհային շուկայում նկատվող
գների կտրուկ տատանումները` թե' աճը, եւ թե' նվազումը, ուղղակիորեն
չեն անդրադառնում հանրապետության շուկայական գների վրա:
Տ.Սարգսյանի խոսքերով, գների աճի զսպման կառավարության կողմից
մշակվող ծրագիրը ներառում է 4 ուղղություններ: Դրանցից առաջինը
հակաբյուջետային քաղաքականության իրականացումն է, քանի որ գնաճային
ճնշումները զսպելու համար պետք է ունենալ զսպողական բյուջե:
Երկրորդը` ԿԲ-ի կողմից իրականազվող դրամավարկային
քաղաքականությունն է, քանի որ գնաճը զսպելու համար ԿԲ-ն պարտավոր է
բարձրացնել վերաֆինանսավորման տոկոսադրույքները: Երրորդ
ուղղությունը մրցակցային դաշտի ստեղծումն է: Այս հարցում մեծ
դերակատարություն պետք է ունենա Տնտեսական մրցակցության պետական
հանձնաժողովը, որը համալիր ստուգումներ է անցկացնում այն
շուկաներում, որտեղ մրցակցության բացակայության պատճառով գներն
արագորեն բարձրանում են, բայց իջնում են շատ դանդաղ: Հանձնաժողովն
իր ստուգումների արդյունքները հայտնում է հարկային մարմիններին,
որոնք նույնպես հնարավորություն ունեն ստուգումներ կատարել եւ
բացահայտել գերշահույթների դեպքերը: Եվ վերջապես,
գյուղատնտեսության արտադրանքի աճը, որը, սպառողական զամբյուղում
սննդամթերքի տեսակարար կշռի բարձր մակարդակի պատճառով, զսպող
ազդեցություն ունի գների մակարդակի վրա: Ըստ վարչապետի, որպեսզի
վերավաճառողները չկարողանան գյուղացիներին թելադրել իրենց գները,
նույնպես անհրաժեշտ է ներդնել մրցակցային մեխանիզմներ: