ՎԱՇԻՆԳՏՈՆ, 4 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Միացյալ Նահանգներում
այսօր անցկացվում են համընդհանուր ընտրություններ, որոնց
արդյունքում հայտնի կդառնա երկրի հերթական` 44-րդ նախագահը: Դրանից
բացի, պետք է ամբողջությամբ փոխվի ԱՄՆ-ի Կոնգրեսի
Ներկայացուցիչների պալատի կազմը եւ մեկ երրորդով` Սենատի կազմը:
Կընտրվեն նաեւ 50 նահանգներից 11-ի նահանգապետներ:
Սպիտակ տան համար պայքարին մասնակցում են երկու սենատորներ`
47-ամյա դեմոկրատ Բարաք Օբաման եւ 72-ամյա հանրապետական Ջոն
Մակքեյնը: Հասարակական կարծիքի հարցումների տվյալներով, ընտրողների
մեծամասնության աջակցությունն է վայելում Օբաման` մոտավորապես 9
տոկոսով առաջ անցնելով մրցակցից: Շատ քաղաքագետների կարծիքով, դա
պատկառելի տարբերություն է, եւ Օբաման «չափազանց մոտիկ» է այն
բանին, որպեսզի ութ տարի անց դեմոկրատներին վերադարձնի նախագահական
աթոռը:
2008 թ. նախագահական արշավի հատկանշական առանձնահատկությունը
ամերիկացիների ակտիվ մասնակցությունն է ընտրություններին: Սպասվում
է, որ ընտրատեղամասեր կգնան մոտ 160 մլն ընտրողներ, այդ թվում`
աֆրոամերիկացիների մոտ 70 տոկոսը, ինչը կարող է դառնալ սեւամորթ
քաղաքացիների ամենազանգվածային մասնակցությունը սկսած 1968
թվականից: