2008 Թ.-Ի ԱՊՐԻԼԻՆ 2007Թ.-Ի ԴԵԿՏԵՄԲԵՐԻ ՀԱՄԵՄԱՏ ԱՄՆ ԴՈԼԱՐԻ
ՆԿԱՏՄԱՄԲ ՀԱՅԿԱԿԱՆ ԴՐԱՄԻ ՀԱՇՎԱՐԿԱՅԻՆ ՓՈԽԱՐԺԵՔԸ 1,7%-ՈՎ ԱՃԵԼ Է
14-05-2008 17:00:00 | Հայաստան | Տնտեսություն
ԵՐԵՎԱՆ, 14 ՄԱՅԻՍԻ, ՆՈՅՅԱՆ ՏԱՊԱՆ: 2008թ.-ի ապրիլին մարտի
համեմատ Հայաստանի սպառողական եւ արժութային շուկաներում
արձանագրվել է գների եւ ԱՄՆ դոլարի նկատմամբ հայկական դրամի
հաշվարկային փոխարժեքի, համապատասխանաբար, 1,1% եւ 0,2% հավելաճ:
ՀՀ Ազգային վիճակագրական ծառայության տվյալներով, 2008թ.-ի
ապրիլին 2007թ.-ի դեկտեմբերի համեմատ սպառողական գների եւ
հաշվարկային փոխարժեքի հավելաճը կազմել է, համապատասխանաբար, 6% եւ
1,7%: Նախորդ տարվա նույն ժամանակահատվածում սպառողական գների 2,1%
հավելաճին զուգընթաց հանրապետությունում գրանցվել է հաշվարկային
փոխարժեքի 0,4% նվազում:
2008թ.-ի ապրիլին ԱՄՆ դոլարի նկատմամբ հայկական դրամի միջին
հաշվարկային փոխարժեքը կազմել է 309,14 դրամ, ինչը 14,9%-ով ցածր է
նախորդ տարվա ապրիլի համապատասխան ցուցանիշից (363,33 դրամ):