ԸՍՏ ՀՀ ԿԲ-Ի ԿԱՆԽԱՏԵՍՄԱՆ, 2008 Թ.-ԻՆ ՀԱՅԱՍՏԱՆՈՒՄ ԳՆԱՃԸ
ԿԿԱԶՄԻ 7,4%
14-04-2008 20:00:00 | Հայաստան | Տնտեսություն
ԵՐԵՎԱՆ, 14 ԱՊՐԻԼԻ, ՆՈՅՅԱՆ ՏԱՊԱՆ: ՀՀ կենտրոնական բանկը
ներկայացրել է 12-ամսյա հեռանկարում գնաճի կանխատեսումները: Ինչպես
հայտնեցին ՀՀ ԿԲ-ի մամուլի ծառայությունից, ըստ ապրանքատեսակների
գնաճի մոդելով կանխատեսումների, շուկայի տոկոսադրույքների անփոփոխ
մակարդակի պահպանման վարկածի պայմաններում, 2009թ.-ի առաջին
եռամսյակի ավարտին 12-ամսյա գնաճը կկազմի 6,9%, իսկ 2008թ.-ի
չորրորդ եռամսյակի ավարտին` 7,4%: Նախորդ կանխատեսումների համեմատ
ներկա կանխատեսումները ճշգրտվել են աճի ուղղությամբ` հաշվի առնելով
2008թ.-ի առաջին եռամսյակում գնաճի զարգացումները: Մասնավորապես,
հումքային եւ պարենային ապրանքների միջազգային գները որոշակիորեն
կնվազեն` սկսած 2008թ.-ի երկրորդ կիսամյակից, Հայաստանի իրական
ՀՆԱ-ի աճի տեմպերը կպահպանվեն` համախառն պահանջարկի` իր
հավասարակշիռ մակարդակը փոքր-ինչ գերազանցող ցուցանիշի
պայմաններում:
ՀՀ ԿԲ-ն հավանական է համարել, որ երկրում գնաճի փաստացի
ցուցանիշը կանխատեսվածից մեծ կարող է լինել նավթի եւ պարենային
ապրանքների (այդ թվում` հացահատիկի) միջազգային գների
կանխատեսվողից ավելի բարձր աճի պատճառով. ընդ որում` նավթի գների
աճը կախված կլինի ինչպես աշխարհաքաղաքական, այնպես էլ արտաքին
տնտեսական զարգացումներից: Հայաստանում կանխատեսվածից ավելի բարձր
գնաճի արձանագրմանը կարող է նպաստել տնտեսության վարկավորման
սպասվողից բարձր աճը, որը կարող է հանգեցնել ամբողջական պահանջարկի
լրացուցիչ խթանման:
Նշվել է, որ գյուղատնտեսության ճյուղի արտադրության
ծավալներից կախված` պարենային ապրանքների գները կարող են ընդհանուր
գնաճի վրա ազդեցության ունենալ ինչպես նվազման, այնպես էլ աճի
ուղղությամբ:
Հաշվի առնելով 2008թ.-ի առաջին եռամսյակի զարգացումները եւ
հետագա 12-ամսյա կանխատեսումները, ԿԲ-ի խորհուրդը արձանագրել է, որ
առաջին եռամսյակի վերջում արտաքին միջավայրի գնաճային ճնշումները
շարունակել են աճել` էապես անդրադառնալով պարենային ապրանքների
ներքին գների վրա: Սպասվում է, որ արտաքին միջավայրից գնաճի բարձր
ճնշումները կպահպանվեն 2008թ.-ի երկրորդ եռամսյակում եւ լավագույն
դեպքում կսկսեն թուլանալ միայն 2008թ.-ի երկրորդ կիսամյակից սկսած,
ընդ որում, միայն իրադարձությունների բավականին բարենպաստ
զարգացման դեպքում: Մեծացել է նաեւ արտաքին միջավայրի հետագա
զարգացումների անորոշության աստիճանը: Հնարավոր են դեֆլյացիոն
ռիսկերը, սակայն, ամենայն հավանականությամբ, գնաճային ճնշումների
ավելացման ուղղությամբ ռիսկերը գերիշխող կլինեն: Միաժամանակ,
վերոհիշյալ զարգացումների երկրորդային ազդեցությունները`
զուգորդվելով նախորդ ժամանակահատվածից փոխանցվող հավելուրդային
պահանջարկի ազդեցությամբ, սկսում են դրսեւորվել` հանգեցնելով ոչ
պարենային ապրանքների գների եւ ծառայությունների սակագների
բարձրացմանը:
Այս իրավիճակում դրամավարկային պայմանների աստիճանական
խստացումը նպատակ ունի մեղմել նշված զարգացումներով պայմանավորված
գնաճային սպասումները եւ երկրորդային ազդեցությունները:
Միաժամանակ, խորհուրդը մատնանշել է, որ մշտապես պետք է
ուշադրության կենտրոնում գտնվեն նաեւ փողի բազայի աճի միտումները:
Արտաքին միջավայրի գնաճային ճնշումների մեղմման
գնահատականների, երկրորդային գնաճային ազդեցությունների չափի եւ
գնաճի իներցիայի ուժգնության վերաբերյալ տարակարծությունների
պայմաններում խորհուրդը քննարկել է ԿԲ-ի ռեպո գործարքների
տոկոսադրույքը 0,25 կամ 0,5%-ով բարձրացնելու տարբերակները:
Արդյունքում, 2008թ.-ի ապրիլի 2-ի նիստում ԿԲ խորհուրդը
որոշում է կայացրել բարձրացնելու վերաֆինանսավորման տոկոսադրույքը
0,25%-ով` այն սահմանելով 6,50%: Լոմբարդային վարկի եւ ավանդի
տոկոսադրույքները սահմանվել են համապատասխանաբար, 9,5% եւ 3,5%: