2008 Թ.-Ի ՀՈՒՆՎԱՐԻՆ ՆԱԽՈՐԴ ՏԱՐՎԱ ՆՈՒՅՆ ԱՄՍՎԱ ՀԱՄԵՄԱՏ
ԿԵՆՍԱԹՈՇԱԿՆԵՐԻ ՖԻՆԱՆՍԱՎՈՐՄԱՆ ԾԱՎԱԼՆ ԱՃԵԼ Է 85,9%-ՈՎ, ԻՍԿ
ՆՊԱՍՏՆԵՐԻՆԸ` 37,1%-ՈՎ
11-03-2008 19:30:00 | Հայաստան | Տնտեսություն
ԵՐԵՎԱՆ, 11 ՄԱՐՏԻ, ՆՈՅՅԱՆ ՏԱՊԱՆ: 2008թ.-ի հունվարին ՀՀ
պետբյուջեի ծախսերի 51,2%-ն ուղղվել է սոցիալական նպաստներին եւ
կենսաթոշակներին, որոնք կազմել են 16,5 մլրդ դրամ (մոտ 53,8 մլն
ԱՄՆ դոլար) կամ եռամսյակային ծրագրի 32%-ը: Մասնավորապես, 13,1
մլրդ դրամ է տրամադրվել կենսաթոշակներին, 3,4 մլրդ դրամ`
նպաստներին: 2007թ.-ի հունվարի համեմատ կենսաթոշակների
ֆինանսավորման ծավալն աճել է 85,9%-ով, իսկ նպաստներինը` 37,1%-ով:
ՀՀ Ֆինանսների եւ էկոնոմիկայի նախարարության լրատվական
ծառայության տվյալներով, 2008թ.-ի հունվարին պետական բյուջեի ոչ
ֆինանսական ակտիվների հետ գործառնությունների ծախսերը կազմել են
886,6 մլն դրամ, որից 1,7 մլրդ դրամ կազմել են ոչ ֆինանսական
ակտիվների գծով ծախսերը, իսկ 2,6 մլրդ դրամ` ոչ ֆինանսական
ակտիվների օտարումից մուտքերը: 2007թ.-ի հունվարի համեմատ ոչ
ֆինանսական ակտիվների գծով ծախսերը նվազել են 24,5%-ով, իսկ ոչ
ֆինանսական ակտիվների օտարումից մուտքերը` 34,7%-ով:
2008թ.-ի հունվարի ընթացքում ՀՀ պետբյուջեն (առանց արտաքին
աղբյուրներից ֆինանսավորվող վարկային ծրագրերի գծով միջոցների
ներհոսքի) կատարվել է 15,2 մլրդ դրամ հավելուրդով: Ընդ որում,
հավելուրդը ներքին աղբյուրներից ֆիանանսավորվել է 12,9 մլրդ դրամի,
իսկ արտաքին աղբյուրներից` 2,3 մլրդ դրամի չափով: Նախորդ տարվա
հունվարի համեմատ պետական բյուջեի հավելուրդը նվազել է 34%-ով, ընդ
որում, ներքին աղբյուրներից ձեւավորված հավելուրդը նվազել է
39,7%-ով, արտաքին աղբյուրներից` ավելացել 44,7%-ով:
Հավելուրդի ֆինանսավորման ներքին աղբյուրներում 4,2 մլրդ դրամ
են կազմել փոխառու միջոցներից (արժեթղթերից) զուտ մուտքերը: Շուրջ
8,7 մլրդ դրամով ավելացել են ազատ բյուջետային միջոցները:
2008թ.-ի հունվարին ՀՀ պետբյուջեից վարկավորումը կազմել է 1,8
մլրդ դրամ, որը տրամադրվել է ԼՂՀ-ին: Այն 25,4%-ով գերազանցել է
նախորդ տարվա նույն ցուցանիշը:
Արտաքին պարտավորությունների մարմանը 2008թ.-ի հունվարին
ուղղվել է 474,8 մլն դրամ, որը հատկացվել է Համաշխարհային բանկի
աջակցությամբ իրականացվող ծրագրերի գծով պարտքի մարմանը: