ՀՀ 2009 Թ.-Ի ՊԵՏԲՅՈՒՋԵԻ ՆԱԽԱԳԾՈՎ ԿՐԹՈՒԹՅԱՆ ԲՆԱԳԱՎԱՌԻ
ԾԱԽՍԵՐԸ ԿԿԱԶՄԵՆ ՇՈՒՐՋ 126,4 ՄԼՐԴ ԴՐԱՄ, ԻՍԿ ԳԻՏՈՒԹՅԱՆԸ` 8,3 ՄԼՐԴ
ԴՐԱՄ
28-10-2008 19:22:00 | Հայաստան | Տնտեսություն
ԵՐԵՎԱՆ, 28 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: 2009թ.-ի պետբյուջեի
նախագծով կրթության բնագավառի ծախսերը, առանց պետական կառավարման
ապարատի պահպանման եւ գիտության գծով ծախսերի, կազմում են շուրջ
126,4 մլրդ դրամ, ինչը 2008թ.-ի հաստատված ցուցանիշից ավելի է
շուրջ 23 մլրդ դրամով կամ 22,2 տոկոսով: Գիտության բնագավառի
ծախսերը նախատեսված են 8,3 մլրդ դրամի չափով: 2008թ.-ի ճշտված
բյուջեի նկատմամբ ծախսերի աճը կազմում է շուրջ 1,4 մլրդ դրամ կամ
շուրջ 21 տոկոս: Այս մասին ՀՀ Ազգային Ժողովի մշտական
հանձնաժողովների հոկտեմբերի 28-ի համատեղ նիստում հայտնեց ՀՀ
ֆինանսների նախարարի առաջին տեղակալ Պավել Սաֆարյանը:
Ըստ նրա, կրթության բնագավառում հիմնական գերակայությունն է
համարվում հանրակրթության ոլորտը, որին 2009թ.-ի պետբյուջեի
նախագծով նախատեսվել է ուղղել 71 մլրդ դրամ, ինչը 2008թ.-ի
ցուցանիշի նկատմամբ ավելի է շուրջ 16 մլրդ դրամով կամ 28,8
տոկոսով: Ծախսերի աճը հիմնականում պայմանավորված է մանկավարժական,
վարչական, ուսումնաօժանդակ եւ տնտեսական աշխատողների աշխատավարձերի
գումարի աճով` շուրջ 12,4 մլրդ դրամով, պարտադիր սոցիալական
ապահովության վճարների աճով` 679 մլն դրամով` կապված աշխատավարձերի
բարձրացման հետ: Նախագծով ծախսերի որոշակի աճ է նախատեսվում
կրթության բնագավառի նաեւ այլ ոլորտների համար. մասնավորապես,
բարձրագույն կրթության գծով նախատեսվել է շուրջ 7,6 մլրդ դրամ,
ինչը 2008թ.-ի ցուցանիշի նկատմամբ ավելի է 957,1 մլն դրամով կամ
14,4 տոկոսով: Աճը հիմնականում պայմանավորված է աշխատավարձի եւ
պարտադիր սոցիալական ապահովության վճարների գծով լրացուցիչ
միջոցների նախատեսմամբ, նաեւ կրթաթոշակի ֆոնդի գծով ծախսերի աճով`
սովորողներնի թվաքանակի ավելացմամբ պայմանավորված: Բացի պետբյուջեի
միջոցներով նախատեսված մի շարք ծրագրերից, 2009թ.-ին նախատեսվում է
նաեւ իրականացնել Կրթության որակի եւ համապատասխանության, ինչպես
նաեւ Հայաստանի սոցիալական ներդրումների հիմնադրամի երրորդ
նպատակային ծրագրերը:
Ըստ ՀՀ կրթության եւ գիտության նախարար Սպարտակ Սեյրանյանի,
բանակցություններ են տարվում Համաշխարհային բանկի հետ շուրջ 210
նախադպրոցական հիմնարկների աշխատանքները ֆինանսավորելու համար:
Նշվեց նաեւ, որ իրականացվելիք կրթական ծրագրերի շրջանակներում
2009թ.-ին համակարգչային եւ ինտերնետային կապի ծառայությունների
ծախսերը նախատեսվում են ցանցում արդեն ընդգրկված 644 դպրոցների
ինտերնետային ցանցի սպասարկման եւ պահպանման, ինչպես նաեւ նշված
ցանցում եւս 300 դպրոցի ընդգրկման հաշվարկով: Ներդրումներ են
նախատեսված նաեւ 151 հանրակրթական դպրոցներ համակարգիչներով
համալրելու համար:
ՀՀ 2009թ.-ի պետբյուջեի նախագծով գիտության ծախսերը կուղղվեն
մի շարք ծրագրերի իրականացմանը: Գիտության զարգացումը պետք է
ընթանա «Գիտական եւ գիտատեխնիկական գործունեության մասին» ՀՀ
օրենքի եւ գիտության ու գիտատեխնիկական քաղաքականության
հիմնադրույթներով, ըստ որի, պետության կողմից գիտության
ֆինանսավորումը կիրականացվի բազային, պայմանագրային (թեմատիկ),
նպատակային-ծրագրային ֆինանսավորման ձեւերով: Բազային
ֆինանսավորում ստացող կազմակերպությունների համար նախատեսվել է
շուրջ 5,1 մլրդ դրամ` 2008թ.-ի շուրջ 3,9 մլրդ դրամի դիմաց: Այդ
թվում, հիմնարար եւ կարեւորագույն նշանակություն ունեցող կիրառական
հետազոտությունների իրականացման ծրագրի գծով նախատեսված է 2,45
մլրդ դրամ: 2008թ.-ի նկատմամբ 620 մլն դրամով աճը հիմնականում
պայմանավորված է գիտաշխատողների միջին հաշվարկային աշխատավարձը մոտ
6 տոկոսով եւ տնտեսական ու այլ ծախսերը տվյալ գիտական
կազմակերպության բազային ֆինանսավորման ընդհանուր ծավալի 20-30
տոկոսի չափով ավելացմամբ: Բազային ֆինանսավորման աճը նաեւ
պայմանավորված է գիտական եւ գիտատեխնիկական գործունեության
ենթակառուցվածքի պահպանման ու զարգացման ծրագրի ֆինանսավորման
աճով: Պետական նպատակային-ծրագրային ֆինանսավորման համար
նախատեսվում է 1,07 մլրդ դրամ` 2008թ.-ի 943 մլն դրամի դիմաց: Աճը
պայմանավորված է հիմնականում ՀՀ Պաշտպանության նախարարության
պատվերով կատարվող հատուկ գիտահետազոտական եւ
փորձակոնստրուկտորական աշխատանքների գծով ծախսերի ավելացմամբ:
Պայմանագրային ֆինանսավորման համար նախատեսված է շուրջ 1,55 մլրդ
դրամ` 2008թ.-ի 1,46 մլրդ դրամի դիմաց: 2009թ.-ի պետբյուջեի
նախագծով, ինչպես եւ ընթացիկ տարում, առանձին ծրագրով նախատեսվում
է նաեւ 549,9 մլն դրամ` գիտաշխատողներին գիտական աստիճանների համար
հավելավճարներ տրամադրելու նպատակով: 2008թ.-ին գիտության
դոկտորների համար սահմանվել է 20 հազար դրամ, իսկ թեկնածուների
համար` 10 հազար դրամ (մոտ 33 ԱՄՆ դոլար) հավելավճար: