Հարութ Սասունյան, «Կալիֆոռնիա կուրիեր»
Ես հոգնում եմ մի քանի ամիսը մեկ միեւնույն ուղղումը
պահանջելուց Լոս Անջելես Թայմզից, բայց թերթի լրագրողները կարծես
չեն հոգնում միեւնույն սխալը կատարելուց:
Ընթերցողները հավանաբար գուշակում են, որ ես խոսում եմ Հայոց
ցեղասպանությանը` Թայմզում եւս մեկ ոչ ճշգրիտ անդրադարձի մասին:
Այս անգամ մեղադրյալը լրագրող Ագուստին Գուրզան է:
Օգոստոսի 9-ի թերթի «Օրացույց» բաժնում պրն. Գուրզան մի երկար
առաջնորդող հոդված էր գրել Armenian Navy Band-ի` 12 հոգուց
բաղկացած ազգային-ֆյուժն խմբի ամերիկյան դեբյուտի մասին, որը
կայացել էր Լոս Անջելեսի հեղինակավոր Walt Disney համերգային
սրահում:
Ես զարմացա եւ զայրացա, երբ կարդացի այդ հոդվածում Հայոց
ցեղասպանության հետեւյալ սխալ բնութագրումը. «Հայերը կրում են
իրենց հավաքական ԴՆԹ-ում հիշողությունը այն բանի, որը նրանք
համարում են թուրքերի կողմից ցեղասպանություն 20-րդ դարի սկզբին»:
Պրն. Գուրզան պետք է իմանար, որ Հայոց ցեղասպանությունը ողջ
աշխարհում ճանաչված է, բացառությամբ թուրք ժխտողների եւ նրանց
հետեւորդների: Լրագրողի սխալ հայտարարությունը նաեւ խախտում է
Թայմզի խմբագրական քաղաքականությունը Հայոց ցեղասպանության
հարցում:
Դժբախտաբար, սա Թայմզի լրագրողների կողմից թույլ տրված առաջին
այսպիսի սխալը չէ, ոչ էլ կլինի վերջինը: Վերջին տարիներին այս
թերթն անհամար ուղղումներ է հրապարակել այս հարցի շուրջ: Մոտ մեկ
տարի առաջ մեծ վիճաբանություն էր ծագել հայկական համայնքի եւ
Թայմզի խմբագիրների միջեւ, երբ թողարկող խմբագիր Դուգլաս Ֆրանցն
արգելեց լրագրող Մարկ Արաքսի գրած Հայոց ցեղասպանության վերաբերյալ
մի հոդվածի հրապարակումը: Վիճաբանությունը լուծվեց, երբ Թայմզի
տնօրեն Դեյվիդ Հիլլերը վստահեցրեց համայնքին, որ այլեւս չի
հանդուրժի Հայոց ցեղասպանության վերաբերյալ թերթի որդեգրած
քաղաքականությունից ոչ մի շեղում: Պրն. Ֆրանցն այլեւս չի աշխատում
Թայմզում:
Վեց ամիս անց լրագրող Ռիչարդ Սայմոնն 2007թ. հոկտեմբերի 3-ի
իր հոդվածում մեկ անգամ եւ սխալ բնութագիր տվեց Հայոց
ցեղասպանությունը: Երկու օր անց, երբ ես բողոքեցի պրն. Հիլլերին,
Թայմզը տպագրեց հետեւյալ ուղղումը. «Հայոց ցեղասպանություն.
օսմանյան թուրքերի կողմից հայերի սպանությունը որպես
ցեղասպանություն ճանաչելու օրինագծի մասին չորեքշաբթի օրվա A բաժնի
մի հոդվածում ասվում էր «Հայերն ասում են, որ 1,5 միլիոն մարդ է
զոհվել իրենց ժողովրդից, որպես արեւելյան Թուրքիայից նրանց
տարհանելու ծրագրի մի մաս»: Հայտարարությունը չպետք է վերագրվի
միայն հայերին. պատմական վկայությունները եւ հետազոտություններն
ապահովում են ցեղասպանություն տերմինի ճշգրտությունը»:
Այս ուղղումից մեկ տարի էլ չանցած, լրագրող Գուրզան կրկնեց
նույն սխալը իր 2008թ. օգոստոսի 9-ի հոդվածում: Ենթադրելով, որ,
որպես ժամանցի հարցերով լրագրող, նա կարող է տեղյակ չլինել
Հայոց ցեղասպանության նկատմամբ թերթի որդեգրած
քաղաքականությանը` ես զանգահարեցի նրան օգոստոսի 11-ին, որպեսզի
տեղյակ պահեմ նրան իր հնարավոր չգիտակցված սխալի մասին: Նա տեղում
չէր, եւ ես մի հաղորդագրություն թողեցի նրա ձայնային փոստում:
Արձագանք չստանալով պրն. Գուրզայից, ես կապվեցի անմիջապես
Թայմզի խմբագիրների հետ: Հաջորդ օրը ինձ շտապ զանգահարեցին եւ
ասացին, թե խմբագիրները նայել են իմ գանգատը, համարել այն իրավացի
եւ խոստացել են շուտով տպագրել համապատասխան ուղղումը: Իրոք, թերթի
օգոստոսի 14-ի համարում հայտնվեց հետեւյալ ուղղումը.
«Armenian Band. ուրբաթ օրը Walt Disney համերգային սրահում
իր ամերիկյան դեբյուտով հանդես եկող Armenian Navy Band-ի մասին
շաբաթ օրվա օրացույցային բաժնի հոդվածում ասվում էր. «Հայերն իրենց
հավաքական ԴՆԹ-ում կրում են հիշողությունն այն բանի, որը նրանք
համարում են թուրքերի կողմից ցեղասպանություն 20-րդ դարի սկզբին»:
Հայտարարությունը չպետք է պարունակեր «ցեղասպանություն» տերմինի
բնութագրում. պատմական փաստերը եւ հետազոտությունները ցույց են
տալիս, որ այդ տերմինը ճշգիրտ է»:
Այս ուղղումը գրեթե նույնն է, ինչ մեկ տարի առաջ
հրապարակվածը: Չնայած մեր ընթերցողներից ոմանք դավադրություն են
տեսնում Հայոց ցեղասպանությանը թերթի կրկնվող ոչ ճշգրիտ
անդրադարձների հետեւում, ես դրան համաձայն չեմ: Ես հավատում եմ, որ
այս սխալները անում են պարզապես անտեղյակ եւ անփույթ լրագրողները:
Քանի որ հարյուրավոր լրագրողներ են աշխատում Թայմզում, կա
աշխատուժի մեծ հոսունություն, հասկանալի է, որ աշխատակազմի նոր
անդամները կարող են տեղյակ չլինել Հայոց ցեղասպանության
նկատմամբ թերթի որդեգրած քաղաքականությանը:
Որքան էլ որ ես հոգնում եմ Թայմզի հետ կապվելուց ու եւս մեկ
ուղղում խնդրելուց, եկեք նայենք հարցի լուսավոր կողմին: Թայմզի
խմբագիրները միշտ սիրալիր կերպով ընդունել են իմ բողոքը եւ
անմիջապես տպագրել պահաջվող ուղղումը:
Ավելին, ամեն անգամ, երբ Թայմզն այսպիսի սխալ է կատարում,
դրանով եւս մի հնարավորություն է ստեղծվում, որպեսզի թերթը
վերահաստատի Հայոց ցեղասպանության փաստերը եւ հիշեցնի թե ներկա ու
թե նոր ընդունված աշխատողներին այս հարցի նկատմամբ իր` ժամանակով
փորձված քաղաքականության մասին: