ՄԻՆՉԵՎ 2030 ԹՎԱԿԱՆԸ ԱԷԿ-ՆԵՐԻ ԹԻՎՆ ԱՇԽԱՐՀՈՒՄ ԿԱՃԻ 60%-ՈՎ
20-06-2008 14:30:00 | Կորեա | Միջազգային
ՍԵՈՒԼ, 20 ՀՈՒՆԻՍԻ, ՆՈՅՅԱՆ ՏԱՊԱՆ: Մինչեւ 2030 թվականը
ատոմակայանները կդառնան էլեկտրաէներգիայի հիմնական աղբյուրներից
մեկը: 2030 թվականին ԱԷԿ-ների թիվն աշխարհում կմեծանա 60%-ով: Այս
մասին, ինչպես հաղորդում է «Ֆինմարկետը», Հարավային Կորեայում
հայտարարել է Ատոմային էներգիայի միջազգային գործակալության
(ՄԱԳԱՏԷ) ղեկավարի տեղակալ Յուրի Սոկոլովը:
Այսօրվա դրությամբ աշխարհում գործում են մոտ 440 ատոմային
էլեկտրակայաններ, որոնք կենտրոնացած են աշխարհի 30 երկրներում: 103
ԱԷԿ գտնվում են ԱՄՆ-ում, 59-ը` Ֆրանսիայում, 55-ը` Ճապոնիայում եւ
31-ը` Ռուսաստանում: Ներկայումս կառուցվում են եւս 30 ռեակտորներ:
Դրանց մեծ մասը` զարգացող պետություններում: