ԿԱՏՄԱՆԴՈՒ, 12 ՀՈՒՆԻՍԻ, ՆՈՅՅԱՆ ՏԱՊԱՆ: Նեպալի գահընկեց միապետ
Գյանենդրա Շահը թագավորական իշխանության խորհրդանշանները` թագը եւ
գայիսոնը, հանձնել է երկրի կառավարությանը եւ ընդմիշտ մեկնել
Նարայանհիտի պալատից, որը ազգայնացնելուց հետո որոշել են վերափոխել
թանգարանի, հաղորդում են նեպալյան ԶԼՄ-ները:
Ապրիլին ընտրված Նեպալի Սահմանադիր ժողովի մայիսի 28-ի
պատմական նիստը վերացրեց 240 տարի գոյատեւած միապետությունը`
երկիրը հռչակելով դաշնային հանրապետություն: Գյանենդրային այն
ժամանակ 15 օր հատկացրին պալատից դուրս գալու համար:
Սեւ լիմուզինով նախկին թագավորը մեկնել է Նեպալի մայրաքաղաք
Կատմանդուի արվարձան Նահարջունայի թագավորական նստավայր: Նստավայրը
եւս ազգայնացված է, բայց Գյանենդրային թույլատրել են ապրել
քոթեջներից մեկում, քանի դեռ նա իր համար մշտական տուն չի գտել:
Նախկին ինքնակալի անվտանգությունը ապահովելու են 50 զինված
ոստիկաններ եւ 25 զինծառայողներ: