ՌԴ ՊԵՏԴՈՒՄԱՅԻ ԽՈՍՆԱԿԸ ՀՈՐԴՈՐԵԼ Է ԿՐՃԱՏԵԼ ՌՈՒՍԱՍՏԱՆԻ
ՉԻՆՈՎՆԻԿՆԵՐԻ ԹԻՎԸ
14-04-2008 19:15:00 | Ռուսաստան | Միջազգային
ՄՈՍԿՎԱ, 14 ԱՊՐԻԼԻ, ՆՈՅՅԱՆ ՏԱՊԱՆ: «Եդինայա Ռոսիա»-ի
առաջնորդ, ՌԴ Պետդումայի խոսնակ Բորիս Գրիզլովը արտահայտվել է
Ռուսաստանում չինովնիկների թվի նվազեցման օգտին: Ըստ նրա,
չինովնիկների թվի աճը արգելակում է ժողովրդավարության զարգացումը
երկրում:
«Միայն 1995-ից սկսած մինչեւ 2007 թվականը չինովնիկների
թվաքանակը 1 միլիոնից աճել է մինչեւ 1,5 միլիոն մարդու»,- նկատել է
Բորիս Գրիզլովը:
Չինովնիկների բանակի այդ աճը համարելով «վտանգավոր», Բորիս
Գրիզլովը կոչ է արել պետությանը նման ձեւով չլուծել զբաղվածության
խնդիրները երկրում, քանի որ դա սոսկ հավելյալ պայմաններ կստեղծի
կոռուպցիայի համար:
«Ժողովրդավարության զարգացումը երկրում ենթադրում է
չինովնիկների կրճատում»,- ընդգծել է Գրիզլովը` նշելով,
մասնավորապես, դաշնապետական չինովնիկների թվաքանակի նվազեցման
անհրաժեշտությունը, որոնք աշխատում են Դաշնության սուբյեկտներում,
հաղորդում է ԻՏԱՌ-ՏԱՍՍ-ը: