ՏԻՄՈՇԵՆԿՈՆ ՀԱՄԱՁԱՅՆԵԼ Է ԿՈԱԼԻՑԻԱՅԻ ՁԵՎԱՎՈՐՄԱՆ ՅՈՒՇՉԵՆԿՈՅԻ
ՊԱՀԱՆՋԻՆ
12-10-2007 20:25:00 | Ուկրաինա | Միջազգային
ԿԻԵՎ, 12 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իր անունով կոչվող
դաշինքի ղեկավար Յուլյա Տիմոշենկոն համաձայնել է խորհրդարանական
կոաիցիայի եւ կոալիցիոն կառավարության ձեւավորման վերաբերյալ
Ուկրաինայի նախագահ Վիկտոր Յուշչենկոյի բոլոր պահանջներին: Այս
մասին նա հայտնել է մամլո ասուլիսում:
«Մենք ընդունել ենք նախագահի այն պայմանը, որ ներքին գործերի
նախարարի թեկնածությունը, որ ըստ Սահմանադրության կոալիցիան է
առաջարկում, առաջարկելու է նախագահը»,- ասել է Տիմոշենկոն: Ըստ
նրա, նախագահի երկրորդ պայմանը նախարարների կաբինետի մասին օրենքի
նոր խմբագրության ընդունումն էր: «Մեր երկու թիմերը (ՅՈՒՏԴ-ն եւ
«Մեր Ուկրաինա-Ժողովրդական ինքնապաշտպանություն») ամբողջովին
համաձայնեցրել են օրինագիծը: Չի մնացել ոչ մի տարաձայնություն, եւ
մենք պատրաստ ենք այն քննարկել առաջնահերթ, մինչեւ կառավարության
ձեւավորումը»,- հայտարարել է Տիմոշենկոն:
Նախագահի երրորդ պահանջը եղել է 2008 թվականի ընթացքում
հանրաքվեի դնել Սահմանադրության նոր խմբագրությունը: «Մենք
համաձայնեցրել ենք նաեւ նոր Սահմանադրությանն առնչվող
ընթացակարգային հարցերը,- ասել է Տիմոշենկոն:- Դա համընկնում է մեր
թիմի պահանջներին` հանրաքվեով որոշել կառավարման ձեւը, այնուհետեւ
ընդունել նոր խմբագրությունը»: