ՌՈՒՍԱՍՏԱՆՈՒՄ ՀՀ ԴԱՏԱԽԱԶՈՒԹՅԱՆ ՆԵՐԿԱՅԱՑՈՒՑԻՉԸ ՀԱՆԴԻՊԵԼ Է
ՏԻԳՐԱՆ ԱՐԶԱՔԱՆՑՅԱՆԻ ՄԱՀԱՓՈՐՁԻ ԳՈՐԾԸ ՔՆՆՈՂ ՔՆՆՉԱԿԱՆ ԽՄԲԻ ՀԵՏ
27-09-2007 20:40:00 | Հայաստան | Հասարակություն
ԵՐԵՎԱՆ, 27 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ռուսաստանի
Դաշնությունում ՀՀ դատախազության ներկայացուցիչ Կամո Ավակումյանը
սեպտեմբերի 27-ին հանդիպել է ՌԴ դատախազության աշխատակիցների,
ինչպես նաեւ ՀՀ Ազգային ժողովի պատգամավոր Տիգրան Արզաքանցյանի
նկատմամբ բռնարարքի գործով նախաքննությունն իրականացնող քննչական
խմբի հետ: Այս մասին «ՆՈՅՅԱՆ ՏԱՊԱՆ»-ը տեղեկացավ ՀՀ գլխավոր
դատախազության կայքէջից: ՌԴ իրավապահ մարմինների ներկայացուցիչները
իրենց հայաստանցի գործընկերոջը տեղեկացրել են, որ դեպքի առթիվ
հարուցվել է քրեական գործ` ՌԴ քրեական օրենսգրքի 30-105-րդ հոդվածի
(սպանության փորձ) հատկանիշներով: Ռուս իրավապահները հավաստիացրել
են, որ ձեռնարկվում են անհրաժեշտ բոլոր միջոցառումները սպանության
փորձի բոլոր հանգամանքները պարզելու, մեղավոր անձանց հայտնաբերելու
ուղղությամբ:
Քրեական գործը գտնվում է Մոսկվայի Տվերսկոյ տարածքային
քննչական բաժնի վարույթում: ՀՀ դատախազության ներկայացուցիչը
տեղյակ կպահվի քրեական գործի ընթացքի մասին:
Հիշեցնենք, որ ԱԺ պատգամավոր, «Գրեյթ Վելի» ընկերության
հիմնադիր եւ նախագահ Տիգրան Արզաքանցյանը սեպտեմբերի լույս 26-ի
գիշերը Մոսկվայի «Մետրոպոլ» խաղատանը կովկասյան արտաքինով 2 անձանց
հետ վեճի է բռնվել, որի հետեւանքով ստացել է դանակի եւ հրազենային
վնասվածքներ: Բժիշկները նրա առողջական վիճակը գնահատում են որպես
«կայուն ծանր»: