ԼՈՒՎՐՅԱՆ «ՍՈՒՐԲ ՀԱՅԱՍՏԱՆ» ՑՈՒՑԱՀԱՆԴԵՍԻ ԿՐԿՆՕՐԻՆԱԿԸ ԿԲԱՑՎԻ
ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
10-09-2007 18:00:00 | Հայաստան | Մշակույթ
ԵՐԵՎԱՆ, 10 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի պատմության
թանգարանում սեպտեմբերի 11-ին կբացվի «Սուրբ Հայաստան` վերադարձ
տուն» ցուցահանդեսը, որը Ֆրանսիայում Հայաստանի տարվա
կապակցությամբ Լուվրում ներկայացված «Սուրբ Հայաստան» ցուցահանդեսի
մասնակի կրկնօրինակն է: Մայր Աթոռ Սուրբ Էջմիածնի, Մատենադարանի եւ
Հայաստանի պատմությասն թանգարանի ցուցանմուշները կներկայացվեն
Երեւանում` հնարավորինս պահպանելով Լուվրի թանգարանի կողմից
իրականացված սցենոգրաֆիայի սկզբունքն ու ոճը:
Ինչպես սեպտեմբերի 10-ին մամլո ասուլիսում հայտնեց Հայաստանի
նախագահի խորհրդական, Ֆրանսիայում Հայաստանի տարվա հայկական կողմի
գլխավոր հանձնակատար Վիգեն Սարգսյանը, լուվրյան ցուցահանդեսի
կրկնօրինակի բացումը Հայաստանում ինքնանպատակ չէ: Ֆրանսիայում
Հայաստանի տարվա պետական հանձնաժողովը, հաշվի առնելով ցուցահանդեսի
գիտական, ճանաչողական եւ ուսուցողական նշանակությունը, ինչպես նաեւ
աննախադեպ հնչեղությունն ու դրա նկատմամաբ հայ հասարակության մեծ
հետաքրքրությունը, որոշում է կայացրել ցուցահանդեսը վերաբացել
Հայաստանում ավելի փոքր մասշտաբներով: Փարիզյան ցուցահանդեսում,
բացի հիշյալ երեք թանգարաններից, ներկայացված են եղել նաեւ
ցուցանմուշներ ինչպես Հայաստանի այլ թանգարաններից, ինչպես նաեւ
արտերկրի հավաքածուներից` Իտալիայից, Ռուսաստանից, Ստամբուլից,
Երուսաղեմից եւ այլն:
Վ.Սարգսյանի խոսքերով, տուն վերադարձած հայկական մշակույթի
նվիրական արժեքները կներկայացվեն ժամանակագրական ութ տարբեր
բաժիններով: Ցուցահանդեսը կսկսվի Աստվածաշնչյան Հայաստանի
վկայություններից` Նոյան տապանի մասունքով եւ կեզրափակվի 17-18-րդ
դարերի Վենետիկի, Կոստանդնուպոլսի, Ուկրաինայի, Լեհաստանի,
Ռուսաստանի, Պարսկաստանի, եւ Հեռավոր արեւելքի հայկական
համայնքներում ստեղծված մշակությին արժեքների ցուդրանքով:
ՀՀ վարչապետ Սերժ Սարգսյանի որոշմամբ, ցուցահանդեսը պարտադիր
պետք է դիտեն Հայաստանի ավագ դպրոցի բոլոր աշակերտները: Նրանց
այցերը կլինեն անվճար:
Ֆրանսիայում Հայաստանի տարին տեւել է 2006թ. սեպտեմբերի 21-ից
մինչեւ 2007թ. հուլիսի 14-ը: «Սուրբ Հայաստան» ցուցահանդեսը, որը
այդ տարվա կարեւոր միջոցառումներից մեկն էր, տեւել է 2007թ.
փետրվարից մինչեւ մայիս: Վիգեն Սարգսյանը հայտնեց, որ «Սուրբ
Հայաստան» ցուցահանդեսը գրանցել է աննախադեպ թիվ ժամանակավոր
ցուցադրության համար` 300 հազար այցելու երեք ամսում: Իսկ «Սուրբ
Հայաստան»-ի խաչքարերի բաժինը, որը տեղադրված է եղել Լուվրի մուտքի
մոտ, դիտել է 2,5 մլն այցելու: «Ֆիգարո» թերթը դրանք անվանել է
«հայկական բուրգեր», իսկ Հայաստանը` «քրիստոնեության ավագ դուստր»:
Վ.Սարգսյանը հայտնեց, որ Հայաստանի տարվա շրջանակներում
կազմակերպվել է 850 միջոցառում Ֆրանսիայի 165 քաղաքներում:
Հայաստանից այդ միջոցառումներին մասնակցել են 17 թանգարաններ եւ
բազմաթիվ մշակությաին կոլեկտիվներ, ընդամենը 1600 մարդ:
Սեպտեմբերի 11-ին Հայստանի պատմության թանգարանում կբացվի
նաեւ Ֆրանսիայում Հայաստանի տարվա տեղեկատվական ցուցահանդես, ուր
կներակայացվեն այն բազմահազար բուկլետնեը, բրոշյուրները,
ցուցապաստառներն ու կատալոգները, որոնք տպագրվել Ֆրանսիայում: