ՀԱՅԱՍՏԱՆԻ ՏԱՐԱԾՔՈՒՄ ՏԱՐԵԿԱՆ ՄԻՋԻՆ ՏԵՂՈՒՄՆԵՐԸ ՆՎԱԶԵԼ ԵՆ
5,8%-ՈՎ, ԻՍԿ ՋԵՐՄԱՍՏԻՃԱՆԸ ԲԱՐՁՐԱՑԵԼ Է 0,7 ԱՍՏԻՃԱՆՈՎ
05-06-2007 16:55:00 | Հայաստան | Հասարակություն
ԵՐԵՎԱՆ, 5 ՀՈՒՆԻՍԻ, ՆՈՅՅԱՆ ՏԱՊԱՆ: «Հալչող սառույց` հրատապ
թեմա». այսպիսին է շրջակա միջավայրի պահպանության համաշխարհային
օրվա` Հունիսի 5-ի, այս տարվա կարգախոսը: Ինչպես նշված է օրվա
առթիվ ՄԱԿ-Ի գլխավոր քարտուղարի ուղերձում, մարդկային
գործունեության արգասիք ջերմոցային գազի արտանետումները երկրագնդի
առավել տաքացման պատճառ են հանդիսանում: Մթնոլորտում ածխածնի
երկօքսիդի խտացումը ավելի բարձր է, քան երբեւէ եղել է վերջին 600
հազ. տարվա ընթացքում, եւ այս գործընթացի տեմպերը գնալով մեծանում
են:
Հունիսի 5-ի օրվան նվիրված միջոցառմանը ՄԱԿ-ի Զարգացման
ծրագրի հայաստանյան գրասենյակի մշտական ներկայացուցչի տեղակալ
Ալեքսանդր Ավանեսովը նշեց, որ Հայաստանը չունի կլիմայական փոփոխման
ադապտացման ռազմավարություն եւ գործողությունների ծրագիր: Մինչդեռ,
ըստ նրա, 1930-1990թթ.-ին արված հետազոտությունների համաձայն,
Հայաստանի տարածքում տարեկան միջին տեղումները նվազել են 5,8%-ով,
իսկ ջերմաստիճանը բարձրացել է 0,7 աստիճանով: «ՄԱԶԾ-ն Գլոբալ
էկոլոգիական ֆոնդի հետ մշակել է համատեղ ծրագիր, որն անդրադառնում
է կլիմայի փոփոխության արդյունքում Հայաստանի վտանգված լեռնային
անտառային էկոհամակարգերի խնդրին»,- նշեց Ա.Ավանեսովը:
Միջոցառման ընթացքում տեղի ունեցավ Էկո-Հայաստան ՀԿ-ների
կոալիցիայի «Թունավորում` հանուն շահի» տեսաֆիլմի շնորհանդեսը: Ըստ
ֆիլմի սցենարի հեղինակ Ինգա Զարաֆյանի, Հայաստանի ընդերքում առկա
են մետաղների գրեթե բոլոր խմբերը` սեւ, ազնիվ, ցրված, գունավոր եւ
թանկարժեք: «Հանքարդյունաբերությունը նոր թափ է առնում
հանրապետությունում, եւ հանքափորային ընկերությունների թիվը վերջին
3 տարվա ընթացքում աճել է 1,5 անգամ, ինչը շրջակա միջավայրին
հսկայական վնաս է հասցնում»,- նշեց Ի.Զարաֆյանը: