«Ա1+» հեռուստաընկերության վերաբերյալ ԵԽ-ի նախարարների կոմիտեի կայացրած որոշման առնչությամբ «ԳԱԼԱ» հեռուստաընկերության նախագահ Վահան Խաչատրյան բաց նամակով դիմել է Հայաստանում հավատարմագրված Եվրոպայի խորհրդի պետությունների դեսպաններին։ Նա խորը հիասթափություն եւ տագնապ է հայտնել, կապված Եվրոպայի Խորհրդի Նախարարների կոմիտեի ընդունած որոշման հետ` փակել «Ա1+» հեռուստաընկերության գործի քննությունը, հիմք ընդունելով այն փաստը, որ Հայաստանի կառավարությունը կատարել է «Ա1+»-ի իրավունքները վերականգնելու իր պարտավորությունները: «Ես շատ լավ գիտեմ, թե ինչպես են Հայաստանում պաշտպանվում լրատվամիջոցների իրավունքները: Մարզային «ԳԱԼԱ» հեռուստաընկերությունը, որը ես ղեկավարում եմ, շարունակում է վարչական եւ իրավական անհեթեթ ճնշումների թիրախ մնալ 2012 թ. ընտրությունների նախօրեին, անգամ այն հանգամանքում, երբ Մարդու իրավունքների եվրոպական դատարանը դեռեւս քննում է 2007 եւ 2008 թվականների մեր հայցը: Ինչպես «Ա1+»-ի, այնպես էլ բոլոր լրատվամիջոցների իրավունքն է ստանալ հավասար եւ արդար վերաբերմունք` համաձայն օրենքի: Ազատ լրատվամիջոցը երաշխավորում է խոսքի ազատության հանրության իրավունքը` հիմնարար քաղաքացիական իրավունք, որը չի կարող պատշաճ կերպով իրականանալ, եթե բացակայում է ԶԼՄ-ների ազատությունը: «Ա1+»-ի դեպքում, թե՛ Մարդու իրավունքների եվրոպական դատարանի դրական որոշումից առաջ, թե՛ դրանից հետո, կառավարությունը չընդունեց նոր օրենքներ կամ կանոնակարգեր, ոչ էլ խստորեն հետեւեց գործող լավ թե վատ օրենքների ու կանոնակարգերի պահանջներին, որպեսզի ցույց տա, որ «Ա1+»-ին եթերի իրավունքից զրկելու սահմանափակումը օրինական է: Անշուշտ մեր կառավարության եւ մեր հասարակության խնդիրն է փոխել եւ բարելավել հայաստանյան լրատվամիջոցների ողորմելի իրավիճակը: Ուրիշները չեն կարող դա անել մեզ համար: Բայց դուք չեք կարող անտեսել մեր հասարակության, մեր հասարակական կազմակերպությունների, մեր ժողովրդի ակնկալիքները ապրել այլ, բարելավված պայմաններում, երբ նշում եք, որ Հայաստանի կառավարությունը կատարել է իր պարտավորությունները, մինչդեռ այն իրականում շարունակում է խուսափել այդ պարտականություններից: Լավ կլիներ, որ մեզ ոչ անհամպատասխան ստանդարտներ պարտադրեք, ոչ էլ աչք փակեք, երբ մենք չենք հասնում մեր իսկ նախանշած ստանդարտներին: Ձեր որոշումը չի խրախուսում նրանց, ովքեր մեր երկրում պայքարում են ժողովրդավարության համար: Այն նաեւ լավ բան չի կանխագուշակում լրատվամիջոցների ազատության համար այսօր, երբ մոտենում է երկամյա լարված ընտրաշրջանը: Դուք ավելի դժվար եք դարձրել լրատվամիջոցների աշխատանքը եւ ավելի հուսահատ եք դարձրել ժողովրդին»,- ասված է «ԳԱԼԱ» հեռուստաընկերության նախագահի նամակում:

---