ՀՀ ՆԱԽԿԻՆ ԱՐՏԳՈՐԾՆԱԽԱՐԱՐԻ ՆԿԱՏՄԱՄԲ ԽԱՓԱՆՄԱՆ ՄԻՋՈՑ Է ԸՆՏՐՎԵԼ
ԿԱԼԱՆՔԸ
10-05-2007 17:59:00 | Հայաստան | Հասարակություն
ԵՐԵՎԱՆ, 10 ՄԱՅԻՍԻ, ՆՈՅՅԱՆ ՏԱՊԱՆ: Երեւանի Կենտրոն եւ
Նորք-Մարաշ համայնքների առաջին ատյանի դատարանը մայիսի 10-ին
բավարարեց ԱԱԾ-ի միջնորդությունը` ՀՀ նախկին արտգործնախարար
Ալեքսանդր Արզումանյանի նկատմամբ երկու ամիս ժամանակով կալանքը
որպես խափանման միջոց ընտրելու մասին:
Ա.Արզումանյանը մեղադրվում է ՀՀ Քրեական օրենսգրքի 190
հոդվածի 3-րդ մասի առաջին կետով` «Հանցավոր ճանապարհով ստացված
եկամուտները օրինականացնել», որով նախատեսվում է 6-12 տարվա
ազատազրկում: Այս մասին «ՆՈՅՅԱՆ ՏԱՊԱՆ»-ի թղթակցին հայտնեց
Ա.Արզումանյանի պաշտպան Հովիկ Արսենյանը: Նա նշեց, որ առաջին
ատյանի դատարանի որոշումը բողոքարկելու է ՀՀ Քրեական գործերով
Վերաքննիչ դատարան: