ԱՆԺԱՄԿԵՏ ՀԱՑԱԴՈՒԼ ԵՆ ՍԿՍԵԼ ՑՄԱՀ ԱԶԱՏԱԶՐԿՄԱՆ ԴԱՏԱՊԱՐՏՎԱԾ 17
ԴԱՏԱՊԱՐՏՅԱԼՆԵՐ
02-05-2007 19:08:00 | Հայաստան | Հասարակություն
ԵՐԵՎԱՆ, 2 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 2-ին «Նուբարաշեն»
քրեակատարողական հիմնարկում անժամկետ հացադուլ են սկսել ցմահ
ազատազրկման դատապարտված 17 դատապարտյալներ: Նրանք պահանջում են
հանդիպում ՀՀ վարչապետ Սերժ Սարգսյանի, Եվրոպայի խորհրդի
ներկայացուցիչ Ելենա Որումովայի, ԵԱՀԿ-ի գրասենյակի, Հելսինկյան
ասոցիացիայի ներկայացուցիչների հետ: Ցմահ ազատազրկման դատապարտված
17 անձինք պարտադիր են համարում նաեւ մամուլի ներկայացուցիչների
ներկայությունը այդ հանդիպման ժամանակ:
«Մեր բողոքն ուղղված է մեր նկատմամբ կիրառված ՀՀ նախագահի
2003թ.-ի օգոստոսի 8-ի անհիմն ու անօրինական «ներման» հրամանագրի
դեմ»,- ասված է ՀՀ վարչապետին, ԵԽ ներկայացուցչին, Հելսինկյան
ասոցիացիային ուղղված դիմումում:
Ըստ դատապարտյալների, նշված ժամանակահատվածում գործող
«Քրեական օրենսգիրքը գործողության մեջ դնելու մասին» օրենքի 4-րդ
հոդվածի 3-րդ մասը արգելում էր նախկին մահապատժի դատապարտվածների
հանդեպ կիրառել նոր` 18.04.2003թ-ին ԱԺ կողմից ընդունված ու նույն
թվականի օգոստոսի 1-ին ուժի մեջ մտած քրեական օրենսգրքի դրույթների
կիրառումը, այդ թվում նաեւ «ցմահ ազատազրկումը», որը այդ օրենսգրքի
դրույթներից է` հոդված 60:
«Այս ամենից հետեւում է, որ ՀՀ նախագահի տվյալ հրամանագիրը
հակասում է ՀՀ օրենսդրությանը, իսկ դրանից հետեւում է, որ ՀՀ
նախագահը անտեսել է նաեւ ՀՀ Սահմանադրության 56/2 հոդվածի
պահանջները, որում ամրագրած է, որ ՀՀ նախագահի հրամանագրերը եւ
որոշումները չպետք է հակասեն ՀՀ Սահմանադրությանն եւ օրենքներին»,-
նշված է ցմահ ազատազրկման դատապարտվածների դիմումում: