ՀԱՅԱՍՏԱՆՈՒՄ ԵՐԵԽԱՆԵՐԻՆ ՄՈՒՐԱՑԿԱՆՈՒԹՅԱՄԲ ԶԲԱՂՎԵԼՈՒ ԵՆ ԴՐԴՈՒՄ
ՀԻՄՆԱԿԱՆՈՒՄ ԾՆՈՂՆԵՐԸ
21-02-2007 15:48:00 | Հայաստան | Հասարակություն
ԵՐԵՎԱՆ, 21 ՓԵՏՐՎԱՐԻ, ՆՈՅՅԱՆ ՏԱՊԱՆ: Պաշտոնական տվյալներով,
վերջին 9 տարիների ընթացքում Հայաստանում հաշվառված թափառաշրջիկ
երեխաների թիվը կրճատվել է մոտ 70 տոկոսով: Այսպես, ՀՀ
Ոստիկանության Անչափահասների գործերով (ԱԳ) ծառայության տվյալների
համաձայն, եթե 1997թ.-ին հանրապետությունում հաշվառված էին այդպիսի
170 երեխաներ, ապա 2005թ.-ին` 79-ը, իսկ 2006թ.-ին` ընդամենը 52:
Նույն աղբյուրի համաձայն, կրճատվել է նաեւ մուրացիկ երեխաների
թիվը:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեցին ՀՀ Ոստիկանության
հասարակայնության հետ կապի եւ լրատվության վարչությունից, 2007թ.-ի
հունվարի 1-ի դրությամբ ԱԳ-ի ստորաբաժանումներում մուրացկանությամբ
զբաղվելու համար պրոֆիլակտիկ հաշվառման մեջ է գտնվել 52 անչափահաս,
որոնցից 14-ը` մինչեւ 14 տարեկան: Նրանցից 43-ը տղաներ են: Այդ
երեխաներից 19-ը հաշվառվել են Արարատի մարզում, 8-ական` Երեւանում,
Գեղարքունիքի եւ Շիրակի մարզերում, 4-ը` Լոռիում, 2-ական`
Արմավիրում եւ Կոտայքում, 1-ը` Սյունիքում:
Նշվեց, որ երեխաների գերակշիռ մասը ներկայումս գտնվում են
իրենց ծնողների մոտ, վերջիններիս հետ տարվում են անհատական
դաստիարակչական բնույթի աշխատանքներ: Բացի այդ, ոստիկանության
օգնությամբ նրանք տեղավորվում են տարբեր ուսումնական
հաստատություններում: Լայնածավալ միջոցառումներ են իրականացվել
նաեւ անչափահասներին մուրացկանության մեջ ներգրավող անձանց
հայտնաբերելու նպատակով եւ պարզվել է, որ անչափահասները դրա մեջ
ներգրավվում են հիմնականում իրենց ծնողների դրդմամբ: