«ՀԱՆ»-Ը ՄԱՐՏ ԱՄՍԻՑ ԱԿՆԱՅԻՆ ԱՆՎՃԱՐ ՀԵՏԱԶՈՏՈՒԹՅՈՒՆՆԵՐ
ԿԻՐԱԿԱՆԱՑՆԻ ԿՈՏԱՅՔԻ, ԼՈՌԻԻ, ՇԻՐԱԿԻ ԵՎ ՏԱՎՈՒՇԻ ՄԱՐԶԵՐՈՒՄ
06-02-2007 16:16:00 | Հայաստան | Հասարակություն
ԵՐԵՎԱՆ, 6 ՓԵՏՐՎԱՐԻ, ՆՈՅՅԱՆ ՏԱՊԱՆ: «Հայկական ակնաբուժության
նախագիծ» (ՀԱՆ) ամերիկյան բարեգործական կազմակերպությունը փետրվարի
19-ից մինչեւ մարտի 15-ը Երեւանի Քանաքեռ-Զեյթուն համայնքում
կիրականացնի անվճար ակնային հետազոտություններ: Ինչպես «ՆՈՅՅԱՆ
ՏԱՊԱՆ»-ի թղթակցին հայտնեց կազմակերպության հայաստանյան գրասենյակի
տնօրեն Նունե Եղիազարյանը, նախաձեռնությունը իրականացվում է ԱՄՆ
Միջազգային զարգացման գործակալության (ՄԶԳ) եւ ՀԱՆ-ի «Առաջնային եւ
ակնաբուժական ծառայությունների դաշինք» ծրագրի շրջանակներում: Ըստ
նրա, աչքի հետազոտություններ կանցկացվեն համայնքի 15 դպրոցներում
(այդ թվում 4-ը` հատուկ), 15 մանկապարտեզներում, 3 բարեգործական
ճաշարաններում, ինչպես նաեւ թաղապետարանում` համայնքի խոցելի
խմբերի համար:
Ն.Եղազարյանը նշեց, որ վերջերս ՀԱՆ-ն ավարտել է իր
գործունեությունը Արարատի մարզում, որտեղ հետազոտվել է 13765 մարդ,
այդ թվում 8084 երեխա: 1080 հիվանդ ուղեգրվել է Աչքի շարժական
հիվանդանոց հետագա զննումների եւ բուժման համար, 349-ը` վիրահատվել
է, իսկ 124-ը` լազերային բուժում ստացել: Մարտ ամսից
կազմակերպությունը ակնային հետազոտություններ կիրականացնի Կոտայքի,
Լոռիի, Շիրակի եւ Տավուշի մարզերում:
Նշվեց նաեւ, որ ՀԱՆ-ը շարունակում է աշխատանքներ իրականացնել
Ս.Մալայանի անվան ակնաբուժական կենտրոնում «Աչքի բանկ» հիմնելու
ուղղությամբ: Այն կլինի տարածաշրջանում միակը եւ կզբաղվի աչքի
հյուսվածքների ձեռք բերմամբ եւ կոնսերվացմամբ, տրանսպլանտանտների
ապահովմամբ, որոնք կօգտագործվեն աչքի տարբեր վիրահատությունների
ժամանակ:
ՀԱՆ-ը հիմնադրվել է ԱՄՆ-ում 1992թ.-ին` ամերիկահայ ակնաբույժ
Ռոջեր Օհանեսյանի կողմից: Կազմակերպության երեւանյան գրասենյակը
բացվել է 2002թ.-ին: