2006 Թ.-ԻՆ ՀՀ ՔԱՂԱՔԱՑԻՈՒԹՅՈՒՆ ԵՆ ԸՆԴՈՒՆԵԼ 1198 ՓԱԽՍՏԱԿԱՆՆԵՐ
31-01-2007 19:40:00 | Հայաստան | Հասարակություն
ԵՐԵՎԱՆ, 31 ՀՈՒՆՎԱՐԻ, ՆՈՅՅԱՆ ՏԱՊԱՆ: 2005թ.-ից իրականցվող
«1988-1992թթ.-ին Ադրբեջանից բռնագաղթած անձանց բնակարանային
ապահովության» պետական ծրագրի շրջանակներում մինչ օրս բնակարանի
ձեռք բերման վկայագրեր են ստացել փախստականների 600 ընտանիքներ:
Ինչպես հունվարի 31-ի ասուլիսում հայտնեց ՀՀ Տարածքային կառավարման
նախարարության Միգրացիոն գործակալության պետ Գագիկ Եգանյանը,
ծրագրով նախատեսված է մշտական օթեւանով ապահովել 3300 փախստական
ընտանիքների: Նա նշեց, որ ծրագիրը այս տարի Աբովյանում
իրականացնելու համար պետբյուջեից կհատկացվի 819 մլն դրամ (մոտ 2,2
մլն ԱՄՆ դոլար): Իսկ 2008թ.-ին այն կիրականացվի նաեւ Երեւանում:
Գ.Եգանյանը հայտնեց նաեւ, որ 2006թ.-ին ՄԱԿ-ի Փախստականների
հարցերով Գերագույն հանձնակատարի հայաստանյան գրասենյակի տրամադրած
միջոցներով բնակարաներով ապահովվել են 79, իսկ Փախստականների
Նորվեգական խորհրդի միջոցներով` 149 փախստական ընտանիքներ:
Նշվեց նաեւ, որ 2006թ.-ին ՀՀ քաղաքացիություն են ընդունել
1198 փախստականներ: Իսկ ընդհանուր առմամբ մինչ օրս ՀՀ
քաղաքացիություն է ընդունել 75 հազար փախստական: