ՀՀ ԱՇԽԱՏԱՆՔԻ ՊԵՏԱԿԱՆ ՏԵՍՉՈՒԹՅՈՒՆԸ ԴԻՄՈՒՄ-ԲՈՂՈՔՆԵՐ Է ՍՏԱՆՈՒՄ
ՀԻՄՆԱԿԱՆՈՒՄ ՄԱՍՆԱՎՈՐ ՀԻՄՆԱՐԿՆԵՐԻ ԱՇԽԱՏՈՂՆԵՐԻՑ
31-01-2007 16:54:00 | Հայաստան | Հասարակություն
ԵՐԵՎԱՆ, 31 ՀՈՒՆՎԱՐԻ, ՆՈՅՅԱՆ ՏԱՊԱՆ: ՀՀ Աշխատանքի պետական
տեսչությունը 2005-2006թթ.-ին իրականացրել է 4816 ծրագրային եւ 299
ըստ անհրաժեշտության ստուգումներ, ինչի արդյունքում վարչական
տուգանքի տեսքով պետբյուջե է գանձվել 304 մլն 181 հազար 341 դրամ
(մոտ 833 հազար ԱՄՆ դոլար): Ինչպես հունվարի 31-ի ասուլիսում նշեց
տեսչության պետ Հարություն Հարությունյանը, խախտումները
հիմնականում վերաբերել են աշխատանքային օրենսդրության եւ
աշխատանքային պայմանագրի իրավունքի նորմերին (45 մլն դրամ):
Արձանագրվել են նաեւ չձեւակերպված աշխատողների 2300 դեպք (վարչական
տուգանքը 115 մլն դրամ), առեւտրի եւ սպասարկման ոլորտում աշխատողի
կողմից անվանաքարտի բացակայության 1025 դեպք (վարչական տուգանքը`
51 մլն 250 հազար դրամ):
Տեսչության պետը նշեց, որ տարեցտարի աճում են
դիմում-բողոքների թիվը, որոնք հիմնականում մասնավոր հիմնարկների
աշխատողներից են: Ըստ նրա, 2005-2006թթ.-ին քաղաքացիներից ստացվել
է աշխատանքային օրենսդրության խախտումներին վերաբերող մոտ 347
դիմում-բողոք:
Հ.Հարությունյանը հայտնեց, որ 2006թ.-ին տեսչությունը
համալրվել է շարժական տեխնիկայով եւ անհրաժեշտ սարքավորումներով:
Դրանք, ըստ նրա, հնարավորություն են տալիս իրականացնել
վերահսկողություն աշխատանքի առողջ եւ անվտանգ պայմանների, այդ
թվում վտանգավոր քիմիական նյութերի, ռադիացիոն ճառագայթման
մակարդակի, փոշու, աղմուկի նկատմամբ, ստուգել թույլատրելի
սահմնային չափանիշներին դրանց համապատասխանությունը: