Վարուժան Իսկենդերյան. Անհրաժեշտ էր Սփյուռքը կազմակերպող
մեկ թիմ. այդ մարմինն արդեն իսկ ստեղծված է եւ ունի հրաշալի
նախարար, որի հետ մեծ գործեր պետք է անենք
Վարուժան Իսկենդերյան. Անհրաժեշտ էր Սփյուռքը կազմակերպող
մեկ թիմ. այդ մարմինն արդեն իսկ ստեղծված է եւ ունի հրաշալի
նախարար, որի հետ մեծ գործեր պետք է անենք
20-10-2009 17:30:00 | Հայաստան | Հասարակություն
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ:
Ամուսիններ Վարուժան ու Սիլվիա-Մյունջան Իսկենդերյանները երկար
տասնամյակներ բնակվում են Ավստրալիայում` 1962 թվականից: Զբաղվում
են ազգային եւ համայնքային գործունեությամբ: Վարուժան Իսկենդերյանը
ծնվել է Երուսաղեմում, իսկ պապերն Այնթափից են` Կիլիկյան պատմական
Հայաստանից: Նրանք 1947 թվականին արաբաիսրայելյան պատերազմի
հետեւանքով գաղթել են Բեթղեհեմ, որտեղ եւ մինչեւ 23 տարեկանն ապրել
է Վարուժան Իսկենդերյանը, հաճախել դպրոց, ապա տեղափոխվել
Ավստրալիա: Շուրջ տասը տարի է, ինչ Վարուժան Իսկենդերյանը
Ավստրալիայում Արցախի ներկայացուցիչն է: Տիկինը` Սիլվիա-Մյունջան
Իսկենդերյանը Ավստրալիայի ՀՕՄ-ի փոխատենապետուհին եւ «Կռունկ»
կանանց միության ատենապետուհին է: Ծնվել է Եգիպտոսում: Փոքր
տարիքից ջարդից մազապուրծ ծնողները գաղթել են Ավստրալիա: Հայրը
եղել է Ավտրալիայում հայ գաղութի հիմնադիրներից մեկը, եւ Սիլվիան
շարունակում է հոր հայրենասիրական, ազգային գործունեությունը: Այս
օրերին Իսկենդերյան ամուսինները գտնվում էին Հայաստանում. նրանք
այցելեցին ՀՀ սփյուռքի նախարարություն եւ պատասխանեցին
hayernaysor.am-ի հարցերին:
- Կխնդրեի մի քանի խոսքով ներկայացնել Ավստրալիայում հայ
համայնքը: Արդյո՞ք այն ունի իրավական գրանցում, թե՞ ավելի
տարերայնորեն է գործում, ի՞նչ կազմ ունի:
- Ավստրալիայում հայ համայնքը մեծ է, շուրջ 30-40 հազար,
չնայած ոմանք նշում են 25 հազար, իսկ որոշ տվյալների համաձայն,
գրանցված է 12-14 հազար հայ: Սակայն կարող եմ վստահաբար ասել, որ
համայնքի թիվն ավելի է, քան 25 հազարը: Համայնքը պահպանում է
հայկական ավանդույթներն ու սովորույթները, հետեւում կրոնական
ծեսերին: Այստեղ գործում է առաքելական-էջմիածնական եկեղեցի, կա
նաեւ 2 ավետարանական եւ 1 կաթոլիկ եկեղեցի: Համայնքը բավական հին է
եւ բարեկեցիկ: Նրանում շատ են ուսյալ եւ գործունյա մարդիկ: Հայ
երեխաները հաճախում են լավ դպրոցներ: Համայնքում գործում են նաեւ
հայկական ամենօրյա 3 եւ եւս 3-4 շաբաթoրյա դպրոցներ: Բավական շատ
կազմակերպություններ են գործում համայնքի ներսում:
- Իսկ համայնքը իրավական գրանցում, ձայնի իրավունք ունի՞,
ճանաչվա՞ծ է:
- Անպայման, սակայն, ցավոք, պետությունը համայնքը ճանաչել է
իբրեւ կրոնական:
- Այսինքն` ինչպե՞ս կրոնական: Հայ համայնքը գրանցված է որպես
կրոնական փոքրամասնություն եւ այն ղեկավարում է հոգեւոր հովիվը:
Համայնքի հետ կապված բոլոր խնդիրներում կամա թե ակամա որոշումներն
ինքն է ընդունում: Այս հարցում կա որոշ անհամաձայնություն: Այսօր
Հայ Դատը ցանկանում է համայնքում ստանձնել ղեկավար դեր, սակայն
տարաձայնությունների պատճառով դա դեռ չի իրականանում:
Շուրջ երեք տարի մի խումբ մարդկանցով փորձեցինք համայնքում
խուրհուրդ ստեղծել, համայնքի ղեկավար ընտրել, սակայն ձեռնարկը
ձախողվեց, քանի որ մի քանի կազմակերպություններ հրաժարվեցին:
Հրաժարվեց նաեւ եկեղեցին` պատճառաբանելով, որ ինքն արդեն իսկ
ղեկավարում է համայնքը եւ նոր ղեկավարության ընտրության կարիքը
չկա: Եվ այսպես խափանվեց համայնքի ղեկավար մարմին ստեղծելու երեք
տարիների մեր աշխատանքը:
- Իսկ համայնքը քաղաքականապես ակտի՞վ է:
- Ավստրալիայում գործում են հայ ավանդական երեք
կուսակցությունները, բազմաթիվ կազմակերպություններ, սակայն
այնուամենայնիվ այսօր օրհասական է հայապահպանության խնդիրը:
Դպրոցներում տարվող աշխատանքները ցանկալի արդյունք չեն տալիս:
Տպավորությունն այն է, որ հոսանքին հակառակ ենք լողում, իսկ ամենից
վատն այն է, որ մեր զավակներն օտարների հետ են ամուսնանում, իսկ
երիտասարդին հետ բերելը շատ դժվար է: Արդեն ոչ մի ազգայնական,
զգայական աշխատանք չի օգնում: Մենք պատմում ենք հայության մասին,
ծանոթացնում հայ ազգի պատմությանը, ներկայացնում Հայաստանն ու
Ղարաբաղը: Մեր մտահոգությունը մեծ է. 40 տարվա հայ համայնքը, որն
այդ տարիների ընթացքում ապրել է աշխույժ, թեթեւ եւ բարեկեցիկ
կյանքով, այսօր արդեն արագորեն նվազում է:
- Արտագա՞ղթ է նկատվում:
- Մեզ մոտ արտագաղթի խնդիր չկա: Մեր համայնքն ուղղակի նվազում
է խառը ամուսնությունների արդյունքում: Հաջորդ սերունդն արդեն իսկ
վտանգված է: Ժողովուրդը դադարում է հայ լինելուց: Դրա լավագույն
ապացույցներից է այն, որ ունենալով երեք հայկական դպրոց` չունենք
աշակերտություն:
- Իսկ հայկական դպրոցները հեղինակություն վայելո՞ւմ են:
- Այո, իհարկե: Հայկական դպրոցն ավարտած յուրաքանչյուր
շրջանավարտ կարող է ուսումը շարունակել ցանկացած ուղղությամբ`
բժշկություն, արվեստ, իրավագիտություն:
- Այդ դեպքում, ինչո՞վ կբացատրեք այն, որ հայ ծնողն իր
երեխային չի տանում հայկական դպրոց:
- Սա ազգային գիտակցության եւ ոչ թե դպրոցի խնդիր է: Քիչ առաջ
ասացի, որ արդեն վտանգված է հաջորդ սերունդը, եւ ինչո՞ւ հաջորդ`
այս սերունդն իսկ արդեն վտանգված է: Ժամանակակից երիտասարդը գրեթե
չի խոսում հայերեն, իսկ հայապահպանությունը ներքին զգացումի խնդիր
է: Հային պետք է վերադարձնել իր արմատներին, հային պետք է հայ
պահել: Եթե մարդն արդեն կորցրել է իր այդ զգացումը, արդեն բարդ է,
արդեն չես կարող պարտադրել: Կան ծնողներ, որոնք կուզենային իրենց
երեխաներին տանել հայկական դպրոց, բայց քանի որ իրենք էլ չեն
տիրապետում հայերենին, հրաժարվում են այդ մտքից: Երանի բոլորս էլ
կատարյալ հայ լինեինք, երանի բոլորս էլ նույն ձեռագրով գրեինք ու
մտածեինք:
- Դուք Արցախի ներկայացուցիչն եք Ավստրալիայում. ի՞նչ
գործունեություն եք ծավալում:
- Առաջին այցելությունս Ղարաբաղ 1993 թվականի մայիսի 9-ին էր:
Նկարահանում էի ավերված ու տանջված գյուղերը, ծվատված
Ստեփանակերտը: Նկարահանում էի ֆիլմեր, ֆոտո, հետո նկարահանումները
տանում էի Ավստրալիա եւ ցուցադրում այնտեղի հայությանը`
ներկայացնելով իրական վիճակն ու պատմությունը: Իմ ֆիլմերն ուղարկել
եմ նաեւ Ղարաբաղի եւ Հայաստանի պաշտոնյաներին: Այսպիսով ղարաբաղյան
մի շարք պաշտոնյաներ տեղյակ էին իմ գործունեության մասին եւ 1999-ի
մայիսին առաջարկեցին դառնալ Ղարաբաղի ներկայացուցիչը
Ավստրալիայում: Տվեցին վկայական, եւ ես շարունակեցի արդեն իսկ
սկսած մարդկային եւ ազգային առաքելությունս:
Իմ կողքին տիկինս է: Նա կիսում է իմ հետաքրքրությունները,
կրում է նույն պապենական պատգամը, ազգային արժանապատվությունը: Մի
պարտականություն ենք վերցրել մեր ուսերին` պայքարը շարունակել
հնարավոր բոլոր ձեւերով, ընդհուպ մեր ընտանեկան գումարների, մեր
ժամանակի հաշվին, քանի որ սա մեր պարտքն է մեր Հայրենիքին: Ուրեմն
ինչն է, որ մեզ առաջ է մղում. այն գիտակցումը, որ Սփյուռքն իր
ծագումով մայր Հայրենիքից է` լինի դա Արեւմտյան Հայաստան, Արցախ,
Նախիջեւան, Հայաստան, թե այլուր, ամենն էլ Հայրենիք է, եւ սա մենք
երբեք չպետք է մոռանանք: Սա բացարձակ է:
- Իսկ ներկայումս Հայաստանից ներգաղթողներ եղա՞ն դեպի
Ավստարալիա:
- Կան, գալիս են, ոչ մեծ ծավալով, բայց գալիս են: Սակայն
շատերը գալիս եւ անգործ են մնում:
- Սփյուռքահայն ի՞նչ ակնկալիք ունի նորաստեղծ ՀՀ սփյուռքի
նախարարությունից:
- Մենք անչափ ուրախ ենք, որ վերջապես Սփյուռքն ունի
համակարգող մարմին: Սփյուռքի նախարարությունը համայն հայության
նախարարությունն է: Հենց այսօր մենք եղանք նախարար Հրանուշ
Հակոբյանի մոտ, ներկայացրեցինք մեր խնդիրները, հոգսերը, ցավերը,
հայտնեցինք մեր մտահոգությունները: Տեղեկացրեցինք նաեւ, որ այսօր
անհամեմատ նվազել է շփումը Հայրենիքի հետ: Նախկինում այս բացը
լրացնում էին արվեստի եւ մշակութային ամենատարբեր խմբերի
այցելություններն ու հյուրախաղերը, համերգները: Սփյուռքի
նախարարությունն արդեն մատահոգ է մեր խնդիրներով, մտածում է` ինչ
անել. քարոզե՞լ, այցելություննե՞ր կազմակերպել: Մտահոգ է նաեւ
մայրենի լեզվի ուսուցման եւ այլ խնդիրներով:
Պետության մեջ մեծ քայլ է արվել: Նկատելի է, որ մտահոգություն
կա Սփյուռքի զավակների մասին: Մենք այդ զավակներն ենք: Պետությունը
ճիշտ քայլ է արել տիկին Հրանուշ Հակոբյանին սփյուռքի նախարար
նշանակելով` ուժեղ, գրագետ, խելացի, ուժեղ կամքի տեր ղեկավար է:
Եթե Հայերնիքը երբեւէ մոռանա սփյուռքի իր զավակներին թե քաղաքական,
թե այլ իմաստով, մեծ հուզումներ կառաջացնի. դրանք հոգեկան
զգացումներ են: Չգիտեմ հասկացա՞ք ինձ:
- Լիովին:
- Գիտե՞ք, մենք բոլորս, որ ապրում ենք արտասահմանում, բոլորս
էլ եկել ենք Արեւմտյան Հայաստանից, ջարդից փախած, որբ զավակի պես
դուրս ենք մնացել Հայրենիքից, եւ սա պետք է միշտ հիշել: Սա շատ
ավելի է կարեւոր: Կապը Հայրենիքի հետ զորավոր պիտի լինի: Քանի որ
մինչեւ այսօր այդ կապը չկար` Սփյուռքը կազմակերպված չէր: Այսքան
երկրների մեջ ամենամեծ Սփյուռքը հայն ունի: Անհրաժեշտ էր մեկ թիմ,
որը կհամակարգեր, կկազմակերպեր Սփյուռքը եւ այդ մարմինն արդեն իսկ
ստեղծված է եւ ունի հրաշալի նախարար` անունը Հրանուշ Հակոբյան, եւ
հույս ունենք նախարարի հետ մեծ գործեր անել: Շատ բան կա անելու:
ՐԱՖՖԻ Ն.Մ.