ՄԱՅԱՄԻՈՒՄ ՎԻՐԱՀԱՏՈՒԹՅԱՆ Է ԵՆԹԱՐԿՎԵԼ ՄԱՐՄՆԻՑ ԴՈՒՐՍ ԶԱՐԳԱՑՈՂ
ՍՐՏՈՎ ՄԻ ԵՐԵԽԱ
23-11-2006 16:36:00 | ԱՄՆ | Միջազգային
ՄԱՅԱՄԻ, 23 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Մայամիի Holtz մանկական
հիվանդանոցի բժիշկները բարդ վիրահատություն են կատարել մի երեխայի,
որը ծնվել էր կրծքավանդակից դուրս գտնվող սրտով,- հաղորդում է
«Ասոշիեյթեդ պրեսը»:
Նասիմ Խասնին լույս աշխարհ է եկել շատ հազվագյուտ բնագծին
արատով` sctopia cordis (սրտի բնածին տեղափոխություն), որը
սովորաբար կրծոսկրի եւ սրտապարկի թերզարգացածության արդյունք է,
կրծքի շրջանի ծալքերը չեն սերտաճում եւ սիրտը մնում է չփակված:
Սովորաբար այդպիսի նորածինները անմիջապես մեռնում են արյան մեջ
թթվածնի անբավարարությունից եւ զարգացող վարակից:
Արատն ախտորոշվել էր ուլտրաձայնի օգնությամբ 2006 թվականի
սեպտեմբերի վերջին, երբ տղայի մայրը` 33-ամյա Միչել Խասնին նկատել
էր երեխայի արտառոց շարժումները:
Վեց ժամ տեւած վիրահատության ընթացքում վիրաբույժները սկզբում
Նասիմի սիրտը փաթաթել են Gore-Tex հատուկ նյութի, հետո իր իսկ
մաշկի շերտի մեջ` փոխարինելով այդ կերպ բացակայող սրտապարկին:
Դրանից հետո սիրտը զգուշորեն տեղավորել են կրծքավանդակում:
Վիրահատությունից հետո տղան շարունակում էր մնալ ծանր, բայց
կայուն վիճակում:
Մի քանի շաբաթ անց Նասիմին կդնեն սինթետիկ նյութից հատուկ
թիթեղիկ, որպեսզի փոխարինեն կրծքապատի արատը: Վեց ամսական հասակում
նրան սպասում է կրծքի վերակառուցման վիրահատություն: