ԱՌԱՋԻԿԱՅՈՒՄ ԱՃՈՒՐԴԻ ԿԴՐՎԻ ՍՆԱՆԿ ՃԱՆԱՉՎԱԾ ՀԱՈՒ-Ի ԳՈՒՅՔԻ ՄԻ
ՄԱՍԸ
27-09-2006 18:40:00 | Հայաստան | Տնտեսություն
ԵՐԵՎԱՆ, 27 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 5-ին
աճուրդի կդրվի սնանկ ճանաչված «Հայկական ավիաուղիներ» (ՀԱՈՒ)
ընկերությանը պատկանող մոտ 85 մլն դրամ (մոտ 220 հազար ԱՄՆ դոլար)
արժողությամբ գույքի մի մասը: Ինչպես «ՆՈՅՅԱՆ ՏԱՊԱՆ»-ի թղթակցի հետ
զրույցում նշեց ՀԱՈՒ-ի լուծարային հանձնաժողովի նախագահ Հրանտ
Ղամբարյանը, բացի այդ վաճառքի է դրված նաեւ ՀԱՈՒ-ին պատկանող ԻԼ-86
օդանավը, որը ներկայումս կայանված է Մոսկվայի «Դոմոդեդովո»
օդանավակայանում: Նրա կայանման համար «Դոմոդեդովոյին» հասանելիք
գումարն արդեն կազմում է մոտ 1 մլն ԱՄՆ դոլար: Մինչդեռ, ըստ
Հ.Ղամբարյանի, այդ օդանավի վաճառքի առավելագույն գինը կազմում է
300 հազար դոլար, իսկ այն աշխատանքային վիճակի բերելու համար
կպահանջվի մոտ 2,5 մլն դոլար: Հ.Ղամբարյանի խոսքերով, եթե այդ
օդանավը չվաճառվի, ապա կվերածվի մետաղի ջարդոնի, ինչպես դա եղավ
ընկերության երկու ՏՈՒ-154 ինքնաթիռների պարագայում:
Նշենք, որ ՀԱՈՒ-ի երեք ՅԱԿ-40 ինքնաթիռները գնել է «Էքպրես
լայն» ավիաընկերությունը:
Հ.Ղամբարյանը տեղեկացրեց նաեւ, ՀԱՈՒ-ի դեբիտորական պարտքը
կազմում է մոտ 9,5 մլրդ դրամ: