«ԳԼՈԲԱԼ ԳՈԼԴ ՄԱՅՆԻՆԳ»-Ը ԶՐԿՎԵԼ Է ՄԱՐՋԱՆԻ ՀԱՆՔԱՎԱՅՐԻ
ՈՒՍՈՒՄՆԱՍԻՐՄԱՆ ԼԻՑԵՆԶԻԱՅԻՑ
05-09-2006 19:00:00 | Հայաստան | Տնտեսություն
ԵՐԵՎԱՆ, 5 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Բնապահպանության
նախարարությունը «Գլոբալ Գոլդ Մայնինգ» ընկերությանը (ԳԳՄ) զրկել է
Մարջանի (Սիսիան) հանքավայրի ուսումնասիրման լիցենզիայից: Այս
մասին սեպտեմբերի 5-ի ասուլիսում հայտնեց բնապահպանության նախարար
Վարդան Այվազյանը: Նա նշեց, որ ընկերությունը տվյալ հանքավայրում
աշխատանքներ իրականացնելու իրավունք այլեւս չունի: Սակայն, քանի որ
ԳԳՄ-ն շարունակում է հանքավայրի ուսումնասիրման աշխատանքները,
նախարարությունը դիմել է ՀՀ Գլխավոր դատախազություն:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց ԳԳՄ-ի տնօրեն Աշոտ
Պողոսյանը, ընկերությունը գրություն է ուղարկել նախարարին`
մատնանշելով ՀՀ համապատասխան օրենքի այն դրույթները, որոնց
համաձայն, «հայտարարությունների կամ նամակների միջոցով ու
միակողմանիորեն լիցենզիայի դադարեցումը արգելվում է»: Ըստ ԳԳՄ-ի
տնօրենի, լիցենզիայից զրկելու վերաբերյալ նախարարությունը պետք է
գրավոր զգուշացներ ընկերությանը, եթե վերջինս խախտում է թույլ
տվել, եւ առնվազն 90 օր ժամանակ տրամադրեր այդ խախտումը վերացնելու
համար: Ըստ Ա.Պողոսյանի, դրանից հետո ընկերությանը պետք է տրվեր
վնասի փոխհատուցման վերադարձման հնարավորություն: Փոխհատուցման
չտրամադրման դեպքում նախարարությունը կարող է դիմել դատարան:
Սակայն, ըստ Ա.Պողոսյանի, ԳԳՄ-ն երբեւէ նման նախազգուշացում
նախարարությունից չի ստացել:
«Եթե նախարարությունը չի ենթարկվելու ՀՀ օրենքի եւ միջազգային
պայմանագրերի հստակ դրույթներին եւ շարունակելու է անօրինական
հայտարարությունները, ուրեմն մենք գործ ունենք մեր ներդրումների
բռնագրավման դասագրքային օրինակի հետ»,- հայտարարեց Ա.Պողոսյանը: