«ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԻՐԱՎՈՒՆՔՆԵՐԻ ԶԱՐԳԱՑՈՒՄ» ՀԿ-Ն
ՊԱՏՐԱՍՏՎՈՒՄ Է ԴԱՏԱԿԱՆ ՀԱՅՑ ՆԵՐԿԱՅԱՑՆԵԼ ԸՆԴԴԵՄ «ՀԱՅՋՐՄՈՒՂԿՈՅՈՒՂԻ»
ՓԲԸ-Ի
28-08-2006 19:10:00 | Հայաստան | Տնտեսություն
ԵՐԵՎԱՆ, 28 ՕԳՈՍՏՈՍԻ, ՆՈՅՅԱՆ ՏԱՊԱՆ: «Հայաստանում ջրային
համակարգը կոռումպացված է»: Այսպիսի հայտարարություն արեցին
օգոստոսի 26-ի ասուլիսում «Քաղաքացիական հասարակության
իրավունքների զարգացում» ՀԿ-ի հախագահ Արտաշես Բարսեղյանը եւ
փաստաբան Հովիկ Արսենյանը:
Ա.Բարսեղյանը, մասնավորապես, փաստեց, որ ինքը, վերջին երեք
տարիներին բնակվելով Արարատի մարզի Քաղցրաշեն գյուղում, ականատես է
եղել տեղի ջրային համակարգի պատասխանատուների անօրինական
գործողություններին, հավաքել է դրանք հաստատող փաստեր եւ
պատրաստվում է հայց ներկայացնել դատարան «Հայջրմուղկոյուղի» ՓԲ
ընկերության դեմ: Իսկ Հ.Արսենյանը հավելեց, որ իրենք ցանկանում են
դատարանի միջոցով ստիպել ընկերությանը կատարել այն
պարտավորությունները, որ վերջինս ստանձնել է սպառողների հետ կնքած
պայմանագրերով:
Ըստ Ա.Բարսեղյանի, ընկերությունը վերջին երեք տարվա ընթացքում
մարզի շուրջ 100 գյուղերից 1 մլրդ դրամ է հավաքել, սակայն նույն
ժամանահատվածում մեկ խողովակ անգամ չի փոխվել կամ վերանորոգվել:
Բացի դրանից, ջրմուղը պարտավոր է ապահովել սպառողներին
մատակարարվող խմելու ջրի որակը, այնինչ ՀԿ-ի նախաձեռնությամբ
ակադեմիկոս Ավդալբեկյանի անվան Առողջապահության ազգային ինստիտուտի
լաբորատորիայում անցկացված փորձաքննությունը ցույց է տվել, որ
Քաղցրաշեն եւ Դվին գյուղերում խմելու ջուրը չի համապատասխանում
պահանջվող չափանիշներին: Եվ չնայած այն բանին, որ այդ ջուրը վտանգ
է ներկայացնում սպառողների առողջության համար,
«Հայջրմուղկոյուղի»-ն պարտադրում է բնակիչներին վճարել դրա դիմաց,
հակառակ դեպքում սպառնալով դադարեցնել ջրամատակարարումը: Այս
ամենը, Ա.Բարսեղյանի գնահատմամբ, կոռուպցիայի դրսեւորում է:
«Ես մտադիր եմ արտերկրից զբոսաշրջիկներ հրավիրել Հայաստան,
բայց ինչպե՞ս իրականացնեմ ծրագրերս. այդ մարդկանց պղտորված ջուր
խմեցնեմ եւ հիվանդացրած ե՞տ ուղարկեմ»,- վրդովված ասաց
Ա.Բարսեղյանը: