ԳՈՐԾԱԾՈՒԹՅԱՆ ՄԵՋ Է ԴՐՎԵԼ ՏԵՂԵԿԱՏՎԱԿԱՆ ՏԵԽՆՈԼՈԳԻԱՆԵՐԻ
ՁԵՌՆԱՐԿՈՒԹՅՈՒՆՆԵՐԻ ՎԻՃԱԿԱԳՐԱԿԱՆ ՀԱՇՎԵՏՎԱԿԱՆ ՁԵՎԸ
22-08-2006 18:35:00 | Հայաստան | Տնտեսություն
ԵՐԵՎԱՆ, 22 ՕԳՈՍՏՈՍԻ, ՆՈՅՅԱՆ ՏԱՊԱՆ: ՀՀ Ազգային վիճակագրական
ծառայությունը (ՀՀ ԱՎԾ) 2006թ.-ից գործածության մեջ է դրել
տեղեկատվական տեխնոլոգիաների ձեռնարկությունների վիճակագրական
հաշվետվական ձեւը: Այս մասին օգոտոսի 22-ի ասուլիսում հայտնեց ՀՀ
ԱՎԾ-ի պետ Ստեփան Մնացականյանը:
Պատասխանելով «ՆՈՅՅԱՆ ՏԱՊԱՆ»-ի թղթակցի հարցին, ԱՎԾ-ի պետը
նաեւ նշեց, որ ՏՏ ոլորտի վիճակագրական տեղեկատվության հավաքագրման
եւ հրապարակման համակարգի ձեւավորման աշխատանքներն ավարտված չեն,
քանի որ դեռեւս կա դրանք ավելի բարձր մակարդակով իրականացնելու
խնդիր: Ըստ Ս.Մնացականյանի, ՀՀ ԱՎԾ-ն, ՀՀ Առեւտրի եւ տնտեսական
զարգացման նախարարության ու Համաշխարհային բանկի հետ ունեցած
պայմանավորվածության համաձայն, այդ նպատակով փորձագետներ է
հրավիրելու արտասահմանյան զարգացած երկրներից:
Ս.Մնացականյանի խոսքերով, ՏՏ ոլորտում ստեղծված արդյունքի
հաշվառումը ՀՆԱ-ի հաշվառումից դուրս չի մնում: ՀՀ ԱՎԾ-ի գնահատված
տվյալներով, մասնավորապես, 2006թ.-ի հունվար-հունիսին Հայաստանի ՏՏ
ոլորտի ձեռնարկությունները մատուցել են 6 մլրդ 132,2 մլն դրամի
(ավելի քան 13,8 մլն ԱՄՆ դոլարի) ծառայություներ, կամ 2005թ.-ի
համապատասխան ցուցանիշից 32%-ով ավելի, այն դեպքւմ, երբ 2006թ.-ի
նշված ժամանակահատվածի ՀՆԱ-ն կազմել է 809 մլրդ 549,3 մլն դրամ,
կամ 2005թ.-ի նույն ժամանակահատվածի ՀՆԱ-ից 11,9%-ով ավելի: