ԿԸՆԴԼԱՅՆՎԻ ՀԱՅ-ԵԳԻՊՏԱԿԱՆ ՀԱՄԱԳՈՐԾԱԿՑՈՒԹՅՈՒՆԸ
ԳՅՈՒՂԱՏՆՏԵՍՈՒԹՅԱՆ ԲՆԱԳԱՎԱՌՈՒՄ
01-08-2006 18:40:00 | Եգիպտոս | Տնտեսություն
ԿԱՀԻՐԵ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանի եւ Եգիպտոսի
միջեւ գյուղատնտեսության բնագավառում երկկողմ համագործակցությունը
խթանելու նպատակով հուլիսի 25-30-ին աշխատանքային այցով Եգիպտոսում
էր գտնվում ՀՀ գյուղատնտեսության նախարարի տեղակալ Սամվել
Գալստյանի գլխավորած պատվիրակությունը: Այցի ընթացքում ՀՀ
պատվիրակությունը հանդիպումներ է ունեցել ԵԱՀ գյուղատնտեսության
նախարարի, գյուղատնտեսական հետազոտությունների կենտրոնի տնօրենի եւ
մասնագիտացված այլ ինստիտուտների ղեկավարների հետ:
ԵԱՀ գյուղատնտեսության նախարարի հետ հանդիպման
ընթացքում ներկայացվել են երկու երկրներում գյուղատնտեսության
զարգացման ուղղությամբ տարվող աշխատանքների ընթացքն ու առաջնային
ծրագրերը, քննարկվել են երկուստեք հետաքրքրություն ներկայացնող
ոլորտներում համագործակցության հնարավորությունները:
Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ
ՏԱՊԱՆ»-ին տրամադրած հաղորդագրության, հայկական կողմը վերահաստատել
է Եգիպտոսի իր գործընկերոջն ուղղված ՀՀ գյուղնախարարի հրավերը`
սեպտեմբերին Երեւանում կայանալիք «AgroForum»-ին մասնակցելու
կապակցությամբ: