2007 Թ.-ԻՆ ՆԱԽԱՏԵՍՎՈՒՄ Է ԱԼԵՔՍԱՆԴՐԻԱՅՈՒՄ ՀԱՅ-ԵԳԻՊՏԱԿԱՆ
ԳՈՐԾԱՐԱՐ ՀԱՄԱԺՈՂՈՎ ԱՆՑԿԱՑՆԵԼ
26-06-2006 18:20:00 | Հայաստան | Տնտեսություն
ԿԱՀԻՐԵ, 26 ՀՈՒՆԻՍԻ, ՆՈՅՅԱՆ ՏԱՊԱՆ: Հայաստանի եւ Եգիպտոսի
միջեւ առեւտրատնտեսական համագործակցության հնարավորությունները
քննարկելու եւ խթանելու նպատակով հունիսի 21-22-ին Եգիպտոսում ՀՀ
դեսպան Ռուբեն Կարապետյանը աշխատանքային այցով գտնվում էր երկրի
արդյունաբերական կենտրոն հանդիսացող` Ալեքսանդրիայի նահանգում:
Այցելության ընթացքում դեսպանը հանդիպումներ է ունեցել
Ալեքսանդրիայի Գործարարների Միության (ԱԳՄ) ղեկավարների հետ,
Ալեքսանդրիայի նահանգապետի եւ գործարար շրջանակների հետ, այցելել
Եգիպտոսի ամենամեծ դեղագործական «Ֆարկո» ընկերություն ու «Զահրան»
կենցաղային եւ էլեկտրական սարքավորումների գործարան:
ԱԳՄ նախագահ Մուհամմեդ Ռագաբի հետ հանդիպման ընթացքում, որին
ներկա էին շուրջ 25 գործարարներ, դեսպանը, ներկայացնելով երկկողմ
հարաբերությունների գոհացնող մակարդակը, հատուկ ընդգծել է
հայ-եգիպտական առեւտրատնտեսական համագործակցության ակտիվացման
անհրաժեշտությունը: Ռ.Կարապետյանը, որպես հեռանկարային,
առանձնացրել է դեղագործական, տեղեկատվական տեխնոլոգիաների,
գյուղատնտեսության, զբոսաշրջության եւ կրթության ու գիտության
ոլորտները:
Հանդիպման արդյունքում պայմանավորվածություն է ձեռք բերվել ՀՀ
համանման կազմակերպության հետ համագործակցության համաձայնագրի
ստորագրման, ինչպես նաեւ 2007թ.-ին Ալեքսանդրիայում հայ-եգիպտական
գործարար համաժողովի անցկացման մասին: Քննարկվել են նաեւ ՀՀ-ում
երկարատեւ ներդրումային ծրագրերի իրականացման հնարավորությունները:
Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ
ՏԱՊԱՆ»-ին տրամադրած հաղորդագրության, ԱԳՄ կողմից ընդունվել է նաեւ
ՀՀ դեսպանի առաջարկը` Շիրակի մարզի գործարարների պատվիրակության
այցը Ալեքսանդրիա կազմակերպելու վերաբերյալ: Այցելության
շրջանակներում հնարավոր կլինի նաեւ ստորագրել Ալեքսանդրիան եւ
Գյումրին քույր-քաղաքներ հռչակելու վերաբերյալ համաձայնագիրը:
Ալեքսանդրիայի Զբոսաշրջության եւ հյուրանոցների բարձրագույն
ինստիտուտի ռեկտոր դոկտոր Մեդհաթ Էլ-Դիբը, որը ներկա էր
հանդիպմանը, հայտարարել է Հայաստանին 5 կրթաթոշակ տրամադրելու
վերաբերյալ իր որոշման մասին: