ԴԵՍՊԱՆ ՎԼԱԴԻՄԻՐ ԿԱՐՄԻՐՇԱԼՅԱՆՆ ԻՐ ՀԱՎԱՏԱՐՄԱԳՐԵՐՆ Է ՀԱՆՁՆԵԼ
ԱՐԳԵՆՏԻՆԱՅԻ ՓՈԽՆԱԽԱԳԱՀԻՆ
12-05-2006 20:10:00 | Արգենտինա | Քաղաքական
ԲՈՒԵՆՈՍ ԱՅՐԵՍ, 12 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Մայիսի 11-ին Արգենտինայի Հանրապետությունում Հայաստանի
Հանրապետության դեսպան Վլադիմիր Կարմիրշալյանն իր հավատարմագրերն է
հանձնել Արգենտինայի փոխնախագահ, Սենատի նախագահ Դանիել Սիոլիին:
Ինչպես «ՆՈՅՅԱՆ ՏԱՊԱՆ»-ին հայտնում են ՀՀ ԱԳՆ մամուլի եւ
տեղեկատվության վարչությունից, պաշտոնական արարողությունից հետո ՀՀ
դեսպան Կարմիրշալյանի եւ ԱՀ փոխնախագահ Սիոլիի միջեւ տեղի է
ունեցել առանձնազրույց: Շնորհավորելով ՀՀ դեսպանին` Արգենտինայի
փոխնախագահը հույս է հայտնել, որ ՀՀ նոր դեսպանի պաշտոնավարման
ընթացքում երկու երկրների բարեկամական կապերն ու
համագործակցությունն էլ ավելի կամրապնդվեն եւ կզարգանան: Երկուստեք
կարեւորվել է տնտեսության, առողջապահության, գիտության, մշակույթի
եւ այլ բնագավառներում ստորագրված միջկառավարական համաձայնագրերի
իրագործմանը նոր թափ հաղորդելու անհրաժեշտությունը:
ՀՀ դեսպանը զրուցակցին է ներկայացրել Հայաստանում տեղի
ունեցող ժողովրդավարական բարեփոխումների գործընթացը, Հայաստանի
արտաքին քաղաքականության կարեւորագույն խնդիրները:
Իր հերթին փոխնախագահ Սիոլին, որը քաջածանոթ է արգենտինահայ
համայնքին եւ բարձր է գնահատում նրա դերը Արգենտինայի
սոցիալ-տնտեսական եւ մշակութային կյանքում, իր պատրաստակամությունն
է հայտնել նպաստել Հայաստանի եւ Արգենտինայի միջեւ
համագործակցության զարգացմանը եւ, համաձայնելով ՀՀ դեսպանի կողմից
արված առաջարկությանը, նկատել է, որ Հայաստանն իրոք կարող է
յուրօրինակ դարպաս հանդիսանալ Հարավային Կովկասում արգենտինյան
ներդրումների համար: