ԹԱՏԵՐԱԿԱՆ ԳՈՐԾԻՉՆԵՐԸ ՆՇԵՑԻՆ ԿԻՄ ԱՐԶՈՒՄԱՆՅԱՆԻ ԾՆՆԴՅԱՆ
80-ԱՄՅԱԿԸ
10-05-2006 19:20:00 | Հայաստան | Մշակույթ
ԵՐԵՎԱՆ, 10 ՄԱՅԻՍԻ, ՆՈՅՅԱՆ ՏԱՊԱՆ: ՀՀ արվեստի վաստակավոր
գործիչ, ականավոր բեմադրիչ, թատերական մանկավարժ, պրոֆեսոր Կիմ
Արզումանյանի ծննդյան 80-ամյակին էր նվիրված մայիսի 10-ին
Հայաստանի Թատերական գործիչների միությունում կայացած հոբելյանական
երեկոն:
Ինչպես նշեց արվեստի վաստակավոր գործիչ Ալեքսանդր Քոչարյանը,
Կիմ Արզումանյանն իր բեմական գործունեությունը սկսել է Պատանի
հանդիսատեսի թատրոնից, ապա շարունակել Մայր թատրոնում (Գաբրիել
Սունդուկյանի անվան Ազգային ակադեմիական թատրոն. «ՆՏ») եւ Հակոբ
Պարոնյանի անվան Երաժշտական կոմեդիայի թատրոնում: Ավելի ուշ`
1951թ. աշխատել է հայկական ռադիոյում, ուր բեմադրել է 34
ռադիոներկայացում: Հետագայում տեղափոխվելով հեռուստատեսություն`
պատրաստել է 40 հեռուստաներկայացում, որոնք այսօր էլ տարիների
հեռվից չեն կորցրել իրենց թարմությունը: Տաղանդավոր արվեստագետի
մանկավարժական գործունեության արդյունքում ձեւավորվել են հայ
ռեժիսորների մի քանի սերունդներ:
Ալ. Քոչարյանի գնահատմամբ, Կիմ Արզումանյանը, բեմից գալով
հեռուստատեսություն, կարողացավ հմտորեն զանազանել բեմի եւ
խցիկ-էկրանի էական տարբերությունը. «Նրա առաջին իսկ ներկայացումից
պարզ դարձավ, որ թատրոնի ռեժիսորը բնականորեն վերածվեց
հեռուստաբեմադրիչի»:
Անվանի բեմադրիչը մշտապես եղել է դասականի, ավանդականի,
իրապաշտականի ջատագովը: «Նա թատերական աշխատանքներում հավատարիմ է
եղել ռեալիստական թատրոնի սկզբունքներին եւ չի ընդունել ժամանակի
հովերի հետ թափանցող «թիթիզություններն» ու «ֆոկուսները»,- ընդգծեց
Ալ. Քոչարյանը:
Կիմ Արզումանյանը թատրոնի համար բեմադրել է 17 ներկայացում,
որոնցից առավելապես հիշատակության են արժանի «Միջնորդ տեր պապան»
եւ «Մադամ Սան-Ժեմը»: Մինչեւ այսօր էլ ժողովուրդն առանձնակի
ջերմությամբ է խոսում Կիմ Արզումանյանի «Սայաթ-Նովա»
հեռուստատեսային կինոնկարի մասին: Այն բազում անգամներ ցուցադրվել
է հեռուստատեսությամբ հանդիսատեսի խնդրանքով: