ԱՊՐԻԼԻՆ ԲԵՅՐՈՒԹՈՒՄ ԱՆՑԿԱՑՎԵԼԻՔ ԳՐՈՂՆԵՐԻ ՀԱՄԱՀԱՅԿԱԿԱՆ ԵՐՐՈՐԴ
ՀԱՄԱԺՈՂՈՎԻ ԾՐԱԳԻՐԸ ԲԱՎԱԿԱՆԻՆ ՀԱԳԵՑԱԾ Է
23-02-2006 16:25:00 | Հայաստան | Մշակույթ
ԵՐԵՎԱՆ, 23 ՓԵՏՐՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Գրողների
համահայկական երրորդ համաժողովին, որ կանցկացվի ապրիլի 6-10-ը
Բեյրութում` Մեծի Տանն Կիլիկիո Արամ Ա կաթողիկոսի
հովանավորությամբ, Սփյուռքի տարբեր գաղթօջախներից կմասնակցեն 150,
իսկ Հայաստանից, Արցախից եւ Ջավախքից` մոտ 50 գրողներ: Ինչպես
«ՆՈՅՅԱՆ ՏԱՊԱՆ»-ի թղթակցի հետ զրույցում նշեց Հայաստանի Գրողների
միության նախագահ Լեւոն Անանյանը, հայաստանյան պատվիրակության
ճանապարհածախսը հոգալու է Կիլիկիո կաթողիկոսարանը:
Լեւոն Անանյանի խոսքերով, Գրողների համահայկական երրորդ
համաժողովի ծրագիրը բավականին հագեցած է: Համաժողովին կլսվեն «Արդի
մանկապատանեկան գրականություն եւ ազգային դպրոցը», «Եղեռնի
անդրադարձը արդի հայ գրականության մեջ», «Հայ գրականության
միջազգայնացման խնդիրը», «Համաշխարհայնացումը եւ արդի
գրականությունը» եւ այլ թեմաներով զեկուցումներ: Համաժողովի
շրջանակում Բեյրութում կբացվի ժամանակակից հայ գրքի ցուցահանդես,
ուր կներկայացվի Հայաստանում վերջին տարիներին հրատարակված 200-250
անուն գիրք, միաժամանակ կկազմակերպվի նաեւ գրքերի
բաժանորդագրություն:
«Նման հանդիպումները, քննարկումները գրողներին
հնարավորություն են տալիս միմյանց ճանաչել եւ գնահատել
ստեղծագործական երկու գրական դաշտերում ստեղծված արժեքները:
Կարծում եմ, «Մեկ ազգ, մեկ մշակույթ» կարգախոսն ուղենիշ պետք է
հանդիսանա Սփյուռքի եւ Հայաստանի գրողների մերձեցման եւ զարգացման
գործում»,- նշեց Հայաստանի Գրողների միության նախագահը:
Ամփոփելով երկրորդ համաժողովից անցած երկու տարիների
արդյունքները, Լեւոն Անանյանը հատկապես կարեւորեց անցած տարի
Հայաստանում անցկացված օտարագիր հայ գրողների համաժողովը: Ըստ ՀԳՄ
նախագահի, երկու համաժողովներից հետո Գրողների միության ջանքերով
համախմբվել են նաեւ Իրանի, Լիբանանի, Թուրքիայի եւ ԱՄՆ տարբեր
գրական կազմակերպությունները, որոնք տարիներ շարունակ պառակտված են
եղել:
ՀԳՄ նախագահը նշեց նաեւ, թե չի բացառվում, որ Գրողների
համահայկական չորրորդ համաժողովը կանցկացվի Մոսկվայում կամ Լոս
Անջելեսում: