ԵՐԵՎԱՆՈՒՄ ՄԵՆԱՀԱՄԵՐԳՈՎ ՀԱՆԴԵՍ ԿԳԱ ԱՄՆ-ԻՑ ՇՆՈՐՀԱՇԱՏ
ԴԱՇՆԱԿԱՀԱՐ ՍԵՐԳԵՅ ԲԱԲԱՅԱՆԸ
15-02-2006 15:55:00 | Հայաստան | Մշակույթ
ԵՐԵՎԱՆ, 15 ՓԵՏՐՎԱՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Հայաստանի
Պետական ֆիլհարմոնիկ նվագախմբի (ՀՊՖՆ) հրավերով, փետրվարի 20-ին
Երեւանի Արամ Խաչատրյան համերգասրահում տեղի կունենա շնորհաշատ
դաշնակահար, մի շարք միջազգային մրցույթների առաջին մրցանակակիր եւ
դափնեկիր Սերգեյ Բաբայանի (ԱՄՆ) մենահամերգը` նվիրված իր ուսուցիչ
Գեորգի Սարաջեւի հիշատակին: Կկատարվեն Մեսիանի, Լիստի,
Ռախմանինովի, Պյարտի, Վայնի եւ Բախի ստեղծագործությունները:
Ինչպես «ՆՈՅՅԱՆ ՏԱՊԱՆ»-ին հայտնում են ՀՊՖՆ-ից, փետրվարի
24-ին Արամ Խաչատրյան համերգասրահում տեղի կունենա Ֆիլհարմոնիկի
բարեգործական համերգը` նվիրված Երեւանի ծերանոցին: Սերգեյ
Պրոկոֆեւի Դաշնամուրի թիվ 2 կոնցերտի կատարումով հանդես կգա Սերգեյ
Բաբայանը: Համերգի երկրորդ բաժնում Էդուարդ Թոփչյանի
ղեկավարությամբ կհնչի Պյոտր Չայկովսկու թիվ 5 սիմֆոնիան:
Սերգեյ Բաբայանը միջազգային լայն ճանաչման արժանացած
դաշնակահար է: Նրա ուսուցիչներն են եղել Լուիզա Մարգարյանը եւ
պրոֆեսոր Գեորգի Սարաջեւը (Երեւան), Վերա Գորնոստաեւան, Լեւ
Նաումովը, Միխայիլ Պլետնյովը եւ Լեւ Վլասենկոն (Մոսկվա): Բախի
երաժշտությունը խորությամբ ուսումնասիրելու նպատակով հաճախել է
Հելմուտ Ռիլինգի դասընթացներին: Առաջին մրցանակներ է շահել Robert
Casadesus (նախկինում` Քլիվլենդի միջազգային մրցույթ, 1990), Palm
Beach (1990), Hamamatsu (1991), Scottish (1992) միջազգային
մրցույթներում: Նա նաեւ դափնեկիր է Queen Elizabeth, Busoni,
Esther Honens (Կանադա) միջազգային մրցույթների:
Համերգային շրջագայություններ է կատարել Եվրոպայում,
Ճապոնիայում, Նոր Զելանդիայում, Ավստրալիայում, Հարավային
Աֆրիկայում, Հարավային Ամերիկայում եւ ԱՄՆ-ում: Ելույթներ է
ունեցել ամենահեղինակավոր համերգասրահներում (Փարիզի Gaveau,
Լոնդոնի Wigmore Hall, Նյու Յորքի Carnegie Hall, Մոսկվայի
Կոնսերվատորիայի Մեծ դահլիճ եւ այլուր): Մասնակցել է Ֆրանսիայի,
Գերմանիայի, Մեծ Բրիտանիայի, Լեհաստանի, Իսպանիայի, ԱՄՆ-ի հայտնի
փառատոններին: Նրա համերգները հեռարձակվել են WQXR, WCLV, Radio
France, Polish Radio, BBC-TV եւ NHK հեռուստա-ռադիոկայաններով,
կատարվել են բազմաթիվ ձայնագրություններ:
Սերգեյ Բաբայանը համագործակցել է աշխարհի լավագույն
նվագախմբերի հետ` Յուրի Տեմիրկանովի, Նեեմե Յարվիի, Հանս Գրաֆի,
Դեյվիդ Ռոբերտսոնի, Կազիմիերժ Կորդի եւ Մայքլ Քրիստիի եւ այլ
անվանի դիրիժորների ղեկավարությամբ: Ընդարձակ է դաշնակահարի
նվագացանկը` դաշնամուրի եւ նվագախմբի համար գրված 45 կոնցերտներ եւ
այլ գործեր:
Սերգեյ Բաբայանը զբաղվում է նաեւ դիրիժորությամբ:
2006-ի ամռանը Բաբայանը Վալերի Գերգիեւի հրավերով մասնակցելու
է Սանկտ Պետերբուրգի «Սպիտակ գիշերներ» փառատոնին` Լյուտոսլավսկու
դաշնամուրի կոնցերտի կատարմամբ:
«Անգերազանցելի ձայնարտաբերում, ֆրազավորման ներդաշնակություն
եւ ապշեցուցիչ վիրտուոզություն ... Նրա կատարումն անմիջականորեն
խոսում է ունկնդրի հետ»,- Բաբայանի մասին գրել է ֆրանսիական
հեղինակավոր «Ֆիգարո» թերթը: