ՀՈԿՏԵՄԲԵՐԻ 7-ԻՆ ԷՋՄԻԱԾՆՈՒՄ ԿՄԵԿՆԱՐԿԻ ՄԱՇՏՈՑԻ ՎԵՐԱԴԱՐՁԸ
ՀԱՅՐԵՆԻՔ ՊԱՏԿԵՐՈՂ «ԳՐՈՑ ԵՐԹ» ԹԱՏԵՐԱԿԱՆԱՑՎԱԾ ՆԵՐԿԱՅԱՑՈՒՄԸ
04-10-2005 19:45:00 | Հայաստան | Մշակույթ
ԵՐԵՎԱՆ, 4 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Առաջիկա
օրերին Երեւանի առավել տեսանելի վայրերում կտեղադրվեն Մեսրոպյան
գրերի գյուտի 1600-ամյակի խորհրդանշանը պատկերող ցուցապաստառներ:
Այս մասին տեղեկացրել է Երեւանի քաղաքապետի տեղակալ Արման
Սահակյանը Մեսրոպյան գրերի գյուտի 1600-ամյակի նշումը
նախապատրաստող հոբելյանական հանձնաժողովի հոկտեմբերի 4-ի նիստին,
որ հրավիրել էր հոբելյանական հանձնաժողովի նախագահ, ՀՀ վարչապետ
Անդրանիկ Մարգարյանը:
Ինչպես «ՆՈՅՅԱՆ ՏԱՊԱՆ»-ին հայտնում են ՀՀ կառավարության
տեղեկատվության եւ հասարակայնության հետ կապերի վարչությունից,
զեկուցվել է, որ ծրագրի շրջանակում նախատեսված` Մեսրոպ Մաշտոցի
վերադարձը հայրենիք պատկերող «Գրոց երթ» թատերականացված
ներկայացման կազմակերպական աշխատանքներն ավարտական փուլում են,
շուրջ 40 րոպե տեւողությամբ այդ ներկայացման վերջին փորձերն են
արվում, եւ նախատեսված ժամանակացույցի համաձայն` հոկտեմբերի 7-ին,
Էջմիածնում կմեկնարկի «Գրոց երթ»-ը: Հոկտեմբերի 8-ին Օշականում
տեղի կունենան Թարգմանչաց օրվան նվիրված միջոցառումները: Ծրագրի
շրջանակում մինչեւ տարեվերջ նախատեսվում են մի շարք այլ
միջոցառումներ եւս` «Ազգային ճակատագիրը եւ գրականությունը»
թեմայով գիտաստեղծագործական կոնֆերանսի անցկացում, հայ գրքի
ցուցահանդեսի կազմակերպում, հոբելյանական միջոցառումներին նվիրված
ամփոփիչ ֆիլմի նկարահանում եւ այլն:
Կշարունակվի միջոցառումների անցկացումը նաեւ Արցախում,
Ջավախքում եւ Սփյուռքի հայաշատ քաղաքներում:
Անդրադառնալով մինչ այժմ իրականացված միջոցառումներին` նշվել
է, որ պատշաճ մակարդակով կազմակերպվել է Մեսրոպյան գրերի գյուտի
1600-ամյակին նվիրված հայագիտական միջազգային գիտաժողովը, «Բանբեր
Երեւանի համալսարանի», «Պատմաբանասիրական հանդեսի» եւ «Հայագիտական
հանդեսի» մեկական համար նվիրվել է Մեսրոպյան գրերի գյուտին,
մայրաքաղաքի Նոր Նորքի 1-ին զանգվածում հիմնվել է հայոց գիրքն ու
գրերը պատկերող ծաղկազարդ պուրակ, կազմվել եւ տպագրվել է «Մեսրոպ
Մաշտոցի գործունեությունը Հայաստանում» քարտեզը, հրատարակվել է
Մեսրոպյան գրերի ստեղծման 1600-ամյակին նվիրված հուշանվերային
բացիկների հավաքածուն, հրատարակվել են մի շարք գրքեր եւ այլն:
Կարեւորվել է միջոցառումներին զուգահեռ հանրապետությունում եւ
արտերկրում ակտիվ քարոզչության ծավալումը, տպագրված գրականության,
թողարկված լազերային սկավառակի եւ այլ նյութերի նպատակային
տարածման համակարգված աշխատանքը: