«ՍՏԵՂԾԱԳՈՐԾԱԿԱՆ ՀԱՄԱԴՐՈՒՄ» ԽՈՐԱԳՐՈՎ ՑՈՒՑԱՀԱՆԴԵՍ-ՎԱՃԱՌՔԻ
ԱՄԲՈՂՋ ՀԱՍՈՒՅԹԸ ԿՈՒՂՂՎԻ ԱՆԱՊԱՀՈՎ ԵՐԵԽԱՆԵՐԻ ԵՎ ԿԱՆԱՆՑ ՍՈՑԻԱԼԱԿԱՆ
ԱՋԱԿՑՈՒԹՅԱՆԸ
04-10-2005 18:10:00 | Հայաստան | Մշակույթ
ԵՐԵՎԱՆ, 4 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Դիվանագետների կանանց
ասոցիացիայի նախաձեռնությամբ հոկտեմբերի 4-ին ՀՀ
արտգործնախարարությունում բացվեց 49 ստեղծագործող հայ կանանց
գեղագիտական աշխատանքների ցուցահանդեսը` «Ստեղծագործական
համադրում» խորագրով:
Ինչպես նշեց ասոցիացիայի նախագահ Նանի Օսկանյանը, այս բացառիկ
ցուցահանդեսի նպատակն է աշխատանքների վաճառքից գոյացած գումարներն
ուղղել Հայաստանում առավել խոցելի խավերի` կանանց եւ երեխաների
սոցիալական աջակցությանը: Բացի այդ, ըստ ասոցիացիայի նախագահի,
միջոցառումը հնարավորություն է ընձեռում հայ ստեղծագործող կանանց
ցուցադրել իրենց աշխատանքները եւ դառնալ ճանաչելի հանրության
շրջանում: Ն. Օսկանյանի խոսքերով, այս նախագծի բացառիկությունն այն
է, որ «ստեղծագործական համադրման» մեջ համախմբում եւ միավորում է
հանրության տարբեր շերտերին` արվեստագետներին, դիվանագետներին,
գործարարներին եւ բարերարներին:
«Որոշ ժամանակ առաջ հասկացա, որ հայկական մշակույթը
միահյուսված է հայ էթնոսի հետ»,- նշեց Հայաստանում Հնդկաստանի
դեսպանի տիկինը` Ռեկհա Վոհրան: Նրա համոզմամբ, հայ կանայք իրենց
ստեղծագործական ներուժով չեն զիջում տղամարդկանց, ավելին, նրանց
աշխատանքներն ավելի զգայուն են ու սրտամոտ` «ինչպես կնոջ
քնքշությունը»: