2006 ԹՎԱԿԱՆԻՆ ԲԵԼԱՌՈՒՍՈՒՄ ԿԿԱԶՄԱԿԵՐՊՎԵՆ ՀԱՅԱՍՏԱՆԻ ՄՇԱԿՈՒՅԹԻ
ՕՐԵՐ
30-09-2005 19:07:00 | Հայաստան | Մշակույթ
ԵՐԵՎԱՆ, 30 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Բելառուսի մշակույթի
նախարար Լեոնիդ Գուլյակոյի գլխավորած պատվիրակությանը, որ
Հայաստանում է Բելառուսի մշակույթի օրերի անցկացման շրջանակում,
սեպտեմբերի 30-ին ընդունել է ՀՀ Ազգային ժողովի նախագահ Արթուր
Բաղդասարյանը:
Հանդիպմանը փոխադարձաբար կարեւորվել է երկու երկրների միջեւ
մշակութային կապերի խորացումը, մշակութային խմբերի փոխանակումը,
հյուրախաղերի կազմակերպումը: Լեոնիդ Գուլյակոն նշել է, որ հայ
արտիստները մեծ հաջողությամբ մասնակցել են Վիտեբսկի «Սլավյանսկի
բազար» եւ Բրեստի փառատոներին եւ ներկայացրել են բարձրակարգ
արվեստ: Նշվել է, որ 2006 թ. Բելառուսում Հայաստանի մշակույթի օրեր
են կազմակերպվելու:
Ինչպես «ՆՈՅՅԱՆ ՏԱՊԱՆ»-ին հայտնում են ԱԺ հասարակայնության
հետ կապերի վարչությունից, Արթուր Բաղդասարյանը հաջողություններ է
մաղթել Բելառուսի մշակույթի օրերին եւ պատրաստակամություն հայտնել
նպաստել երկու երկրների միջեւ մշակութային կապերի զարգացմանը:
Հանդիպմանը ներկա էին երկու երկրների դեսպանները` Մարինա
Դոլգոպոլովան եւ Սուրեն Հարությունյանը: