ՀԱՅԱՍՏԱՆԻ ՉՈՐՍ ԲԻԼԻԱՐԴԻՍՏՆԵՐ ԿՄԱՍՆԱԿՑԵՆ ԲԱԹՈՒՄՈՒՄ ԿԱՅԱՆԱԼԻՔ
ՄԻՋԱԶԳԱՅԻՆ ՄՐՑԱՇԱՐԻՆ
12-09-2005 18:26:00 | Հայաստան | Սպորտ
ԵՐԵՎԱՆ, 12 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 9-12-ը
բիլիարդի ֆեդերացիայի կենտրոնում անցկացվեց «փոքր ռուսական բուրգ»
խաղաձեւի Հայաստանի առաջնությունը: Չեմպիոնի կոչումը վիճարկեցին 32
բիլիարդիստներ, որոնք պայքարեցին կիսաօլիմպիական մրցակարգով. 2
պարտություն կրած մասնակիցը թողնում էր մրցասպարեզը:
Եզրափակիչում հանդիպեցին սպորտի վարպետներ, Հայաստանի բազմակի
չեմպիոններ Միսակ Հախոյանը եւ Սամվել Հունանյանը: 3-2 հաշվով
հաղթելով մրցակցին` 1-ին տեղը գրավեց եւ երկրի չեմպիոնի կոչումը
նվաճեց Հախոյանը: Հունանյանը բավարարվեց 2-րդ տեղով, իսկ 3-րդ
մրցանակակիր դարձավ Խաչատուր Ավետիսյանը:
Այժմ Հայաստանի 4 ուժեղագույն բիլիարդիստներ պատրաստվում են
մասնակցել սեպտեմբերի 20-25-ը Աջարիայի մայրաքաղաք Բաթումում
կայանալիք «Կովկասի գավաթ» խաղարկությանը «բուրգ» խաղաձեւից: